ക്രിമിനൽ കേസ് പ്രതിയായ മുരിയാട് സ്വദേശി മയക്കുമരുന്നുമായി അറസ്റ്റിൽ …
ഇരിങ്ങാലക്കുട :നിരവധി ക്രിമിനൽ കേസ്സുകളിൽ പ്രതിയായ യുവാവ് കഞ്ചാവും വട്ടു ഗുളികയുമായി പോലീസ് പിടിയിലായി. മുരിയാട് സ്വദേശി ഉള്ളാട്ടിക്കുളം വീട്ടിൽ മിൽജോയെ ആണ് (26 വയസ്സ്) തൃശൂർ റൂറൽ എസ്.പി. ഐശ്വര്യ ഡോങ്ങ്ഗ്രേയുടെ നിർദ്ദേശപ്രകാരം ഇരിങ്ങാലക്കുട ഡി.വൈ. എസ്.പി. ബാബു കെ.തോമസിന്റെ നേതൃത്വത്തിൽ ആളൂർ ഇൻസ്പെക്ടർ എം.ബി.സിബിൻ, എസ്.ഐ. കെ.എസ്. സുബിന്ത് എന്നിവർ അറസ്റ്റു ചെയ്തത്. ഇക്കഴിഞ്ഞ സെപ്റ്റംബർ ഒമ്പതാം തിയ്യതി മുരിയാടു സ്വദേശിയായ യുവാവിനെ സംഘം ചേർന്ന് കാറിൽ തട്ടിക്കൊണ്ടുപോയി മർദ്ദിച്ച് അവശനാക്കുകയും നിർബന്ധിച്ച് മദ്യം കുടിപ്പിക്കുകയും ചെയ്ത കേസ്സിൽ മുഖ്യപ്രതിയാണ് മിൽജോ. മർദ്ദനത്തിൽ പരാതിക്കാരനായ യുവാവിന്റെ മൂക്കിന്റെ എല്ല് പൊട്ടുകയും ചെവിയുടെ കർണ്ണപടം പൊട്ടുകയും ചെയ്തു. ഈ കേസ്സിൽ പോലീസ് അന്വേഷിച്ചു വരികയായിരുന്നു. ക്രിമിനൽ സ്വഭാവമുള്ള ഇയാൾ മദ്യത്തിനും മയക്കുമരുന്നിനും അടിമയാണ്. പട്ടിയെ അഴിച്ചുവിട്ട് അയൽവാസിയെ കടിപ്പിക്കാൻ ശ്രമിപ്പിക്കുകയും അടിച്ചു പരുക്കേൽപ്പിച്ച കേസ്സിലും കൊലപാകത ശ്രമം അടക്കമുള്ള കേസ്റ്റുകളിൽ പ്രതിയാണ്. നാട്ടിൽ സമാധാന അന്തരീക്ഷത്തിന് ഭീഷണിയായ പ്രതിക്കെതിരെ ശക്തമായ തുടർനടപടികൾ സ്വീകരിക്കുമെന്നു പോലീസ് അറിയിച്ചു. ബുധനാഴ്ച വേഴക്കാട്ടുകരയിൽ വച്ചാണ് ഇയാളെ പോലീസ് ബൈക്ക് സഹിതം പിടികൂടിയത്. ഇയാളിൽ നിന്ന് കഞ്ചാവും വട്ടു ഗുളികകളും പിടിച്ചെടുത്തിട്ടുണ്ട്. എസ്.ഐ.മാരായ എം.എസ്.പ്രദീപ്, കെ.എം.നാസർ, സീനിയർ സി.പി.ഒ ടി.ആർ.ബാബു, എ.വി.മുരുകദാസ് ,. പി.ആർ. അനൂപ് എന്നിവരാണ് പോലീസ് സംഘത്തിൽ ഉണ്ടായിരുന്നത്.
