റൂട്ട് തെറ്റിച്ച് വന്ന ലിമിറ്റഡ് സ്റ്റോപ്പ് ബസ്സിൽ നിന്ന് തെറിച്ച് വീണ് മതിലകം സ്വദേശിനിയായ യുവതിക്ക് പരിക്കേറ്റു…
ഇരിങ്ങാലക്കുട: റൂട്ട് തെറ്റിച്ച് വന്ന സ്വകാര്യ ലിമിറ്റഡ് സ്റ്റോപ്പ് ബസ്സിൽ നിന്ന് തെറിച്ച് വീണ് യുവതിക്ക് പരിക്കേറ്റു. പരിക്കേറ്റ മതിലകം മഞ്ഞളി വീട്ടിൽ അലീന ജോയിയെ (23 വയസ്സ്) മാപ്രാണം ലാൽ ആശുപത്രിയിൽ പ്രവേശിപ്പിച്ചു.രാവിലെ പത്തരയോടെ ആയിരുന്നു അപകടം. ഇരിങ്ങാലക്കുടയിൽ നിന്ന് തൃശൂർക്ക് പോവുകയായിരുന്ന കെ എൽ 45 നമ്പർ 4599 നമ്പർ എം എസ് മേനോൻ ബസ്സിൽ നിന്ന് തെറിച്ച് വീണായിരുന്നു അപകടം. സ്റ്റാൻ്റിൽ നിന്ന് മെയിൻ റോഡ് വഴി പോകേണ്ട ബസ്സ് ,കാട്ടൂർ റോഡിൽ നിന്ന് തിരിഞ്ഞ് ബൈപ്പാസ് റോഡിലൂടെ പോകുമ്പോൾ വളവിൽ വച്ചാണ് വണ്ടിയുടെ പുറക് വശത്ത് നില്ക്കുകയായിരുന്ന യുവതി തെറിച്ച് വീണത്. യുവതിയെ ബസ്സ് ജീവനക്കാർ ഓട്ടോയിൽ കയറ്റി ആശുപത്രിയിൽ എത്തിക്കുകയായിരുന്നു. പരിക്കുകൾ ഗുരുതമല്ല. കൂടുതൽ വിദഗ്ധ പരിശോധനകൾ നടത്തുമെന്ന് ആശുപത്രി അധികൃതർ അറിയിച്ചു.പരിക്കേറ്റ അലീന ത്യശ്ശൂർ പൂരം എക്സിബിഷൻ കാണാൻ പോവുകയായിരുന്നുവെന്ന് ആശുപത്രിയിൽ എത്തിയ സുഹ്യത്തുക്കൾ പറഞ്ഞു. ഇരിങ്ങാലക്കുട പോലീസ് അപകടസ്ഥലത്തും ആശുപത്രിയിലുമെത്തി തുടർ നടപടികൾ സ്വീകരിച്ചു.
