പടിയൂരില്‍ മെഡിക്കല്‍ മാലിന്യം തള്ളിയ പ്രതി പോലീസ് അറസ്റ്റിൽ..
ഇരിങ്ങാലക്കുട: പടിയൂർ പഞ്ചായത്തില്‍ രണ്ടിടത്ത് മെഡിക്കല്‍ മാലിന്യം ചാക്കുകളിലാക്കി തള്ളിയ ആളെ കാട്ടൂര്‍ പോലീസ് അറസ്റ്റ് ചെയ്തു. പടിയൂര്‍ സ്വദേശി തായേരി വീട്ടില്‍ പ്രദീപ് (50) നെയാണ് കാട്ടൂര്‍ പോലീസ് അറസ്റ്റ് ചെയ്തത്. ഒമ്പതാം വാര്‍ഡ് വളവനങ്ങാടി പോസ്റ്റോഫീസിന് സമീപത്തും 11-ാം വാര്‍ഡില്‍ കോടംകുളം സെന്ററിനടുത്തുമാണ് ഒഴിഞ്ഞ പറമ്പുകളില്‍ ഒരു ടണ്ണിലേറെ വരുന്ന മാലിന്യം ചാക്കുകളിലാക്കി തള്ളിയിരിരുന്നത്. കാലാവധി കഴിഞ്ഞ മരുന്നുകളായിരുന്നു ചാക്കുകളില്‍ നിറയെ. കഴിഞ്ഞ ദിവസം രാത്രിയില്‍ വളവനങ്ങാടി പോസ്റ്റാഫീസിനു സമീപത്തെ മാലിന്യം നീക്കം ചെയ്തിരുന്നു. ഇന്ന് ഉച്ചയോടെ ഈ വ്യക്തി കോടംകുളം സെന്ററിനടുത്തെ മാലിന്യം നീക്കം ചെയ്യുവാനെത്തിയപ്പോഴാണ് നാട്ടുകാർ പോലീസില്‍ വിവരമറിയിച്ചത്. ഉടന്‍ തന്നെ പോലീസും പഞ്ചായത്തധികൃതരും സ്ഥലത്തെത്തി. പോലീസ് പ്രദീപിനെ അറസ്റ്റ് ചെയ്യുകയായിരുന്നു.
