“ശ്രീഭരതൻ്റെ തൃപ്പാദങ്ങളിൽ “; വീഡിയോവിൻ്റെ പ്രകാശനം ആഗസ്റ്റ് 18 ന്
ഇരിങ്ങാലക്കുട : തൃശ്ശൂർ എഞ്ചിനീയറിംഗ് കോളേജ് റിട്ട. അധ്യാപകനും ഉണ്ണായിവാര്യർ സ്മാരക കലാനിലയം മുൻ പ്രസിഡണ്ടും എഴുത്തുകാരനുമായ പ്രൊഫ വി കെ ലക്ഷ്മണൻനായർ രചിച്ച ഹരിതഭൂമി എന്ന കവിതാസമാഹാരത്തിലെ കവിതയെ ആസ്പദമാക്കി ചിത്രീകരിച്ച ‘ ശ്രീ ഭരതൻ്റെ തൃപ്പാദങ്ങളിൽ ‘ എന്ന വീഡിയോചിത്രത്തിൻ്റെ പ്രകാശനം ആഗസ്റ്റ് 18 ന് വൈകീട്ട് 5 ന് കൂടൽ മാണിക്യം ക്ഷേത്രം കിഴക്കേ നടയിൽ നടക്കുന്ന ചടങ്ങിൽ കവി റഫീക്ക് അഹമ്മദ് നിർവഹിക്കും. ചടങ്ങ് ഉന്നത വിദ്യാഭ്യാസ വകുപ്പ് മന്ത്രി ഡോ ആർ ബിന്ദു ഉദ്ഘാടനം ചെയ്യുമെന്ന് മുൻ എംപി പ്രൊഫ സാവിത്രി ലക്ഷ്മണൻ, ചീഫ് കോ-ഓർഡിനേറ്റർ കിഷോർ പള്ളിപ്പാട്ട് എന്നിവർ പത്ര സമ്മേളനത്തിൽ അറിയിച്ചു. നഗരസഭ ചെയർപേഴ്സൺ സുജ സഞ്ജീവ്കുമാർ അധ്യക്ഷത വഹിക്കുന്ന ചടങ്ങിൽ ഐസിഎൽ ഫിൻകോർപ്പ് എംഡി അഡ്വ കെ ജി അനിൽകുമാർ മുഖ്യാതിഥി ആയി പങ്കെടുക്കും. കവിതാസമാഹാരത്തിലെ ഇരുപത്തിയഞ്ചാമത്തെ കവിതയായ ‘ഉൽസവം’ ത്തെ ആസ്പദമാക്കിയാണ് എഴ് മിനിറ്റുള്ള വീഡിയോ തയ്യാറാക്കിയിരിക്കുന്നത്. സംഗമ സാഹിതി പ്രസിഡണ്ട് റഷീദ് കാറളം, പ്രൊഫ വി കെ ലക്ഷ്മണൻനായർ, മധുപള്ളിപ്പാട്ട് എന്നിവരും പത്ര സമ്മേളനത്തിൽ പങ്കെടുത്തു.
