കാട്ടൂർ, കാറളം പഞ്ചായത്തുകളിലെ താഴ്ന്ന പ്രദേശങ്ങളിലെ വീടുകൾ വെള്ളക്കെട്ടിൽ; കാറളം പഞ്ചായത്തിൽ വെള്ളാനിയിൽ കാറ്റിലും മഴയിലും വീട് ഭാഗികമായി തകർന്നു…
ഇരിങ്ങാലക്കുട : തുടർച്ചയായ മഴയിൽ കാട്ടൂർ , കാറളം പഞ്ചായത്തുകളിൽ വീടുകളിൽ വെള്ളം കയറി. കാട്ടൂർ പഞ്ചായത്തിൽ ഒൻപത് വീടുകളിലാണ് വെള്ളം കയറിയത്.വാർഡ് രണ്ടിലും പതിന്നാലിലുമായി ഇത്തിക്കുന്ന്, ചെമ്പൻചാൽ കോളനി എന്നിവടങ്ങളിലെ വീടുകളാണ് വെള്ളക്കെട്ടിലായത്. കരാഞ്ചിറ സെൻ്റ് സേവ്യേഴ്സ് സ്കൂളിൽ ആരംഭിച്ച ദുരിതാശ്വാസ ക്യാമ്പിൽ രണ്ട് കുടുംബങ്ങൾ എത്തിയിട്ടുണ്ട്.
കാറളം പഞ്ചായത്തിൽ ആലുക്കക്കടവ്, നന്തി, ഇളംപുഴ എന്നിവടങ്ങളിലാണ് വെള്ളം കയറിയിട്ടുള്ളത്. കാറളം എഎൽപി സ്കൂളിൽ ആരംഭിച്ച ദുരിതാശ്വാസക്യാമ്പിൽ ആറ് കുടുംബങ്ങളിലായി 14 പേർ എത്തിയിട്ടുണ്ട്. കാറളം പഞ്ചായത്തിൽ വെള്ളാനിയിൽ വാർഡ് 14 ൽ മഴയിലും കാറ്റിലും കൂളിയാട്ടിൽ ലിയോണിയുടെ വീട് തകർന്നിട്ടുണ്ട്.
