49-മത് ക്രൈസ്റ്റ് കോളേജ് ഇൻ്റർ കൊളീജിയേറ്റ് ടൂർണ്ണമെൻ്റ്; മട്ടന്നൂർ പിആർഎൻഎസ്എസ് , അരുവിത്തറ സെൻ്റ് ജോർജ്ജ്, മാവേലിക്കര ബിഷപ്പ് മൂർ, ക്രൈസ്റ്റ് കോളേജുകൾ 
ഇരിങ്ങാലക്കുട : ക്രൈസ്റ്റ് കോളേജിൽ ആരംഭിച്ച 49 – മത് ഇൻ്റർകൊളീജിയേറ്റ് വോളിബോൾ ടൂർണ്ണമെൻ്റിൻ്റെ സെമിയിലേക്ക് മട്ടന്നൂർ പിആർഎൻഎസ്എസ്, അരുവിത്തറ സെൻ്റ് ജോർജ്ജ്, മാവേലിക്കര ബിഷപ്പ് മൂർ , ആതിഥേരായ ക്രൈസ്റ്റ് എന്നീ കോളേജുകൾ പ്രവേശിച്ചു. ആദ്യദിനത്തിലെ മൽസരങ്ങളിൽ മട്ടന്നൂർ പിആർഎൻഎസ്എസ് അങ്കമാലി ഡീ പോൾ കോളേജിനെ 3-1 എന്ന സ്കോറിനും അരുവിത്തറ സെൻ്റ് ജോർജ്ജ് 3 – 2 എന്ന സ്കോറിന് കോഴിക്കോട് ഫിസിക്കൽ എഡ്യുക്കേഷൻ കോളേജിനെയും മാവേലിക്കര ബിഷപ്പ് മൂർ കോളേജ് 3-0 എന്ന സ്കോറിന് ദേവഗിരി സെൻ്റ് ജോസഫ്സിനെയും ആതിഥേരായ ക്രൈസ്റ്റ് 3 – 0 എന്ന സ്കോറിന് പാല സെൻ്റ് തോമസിനെയും പരാജയപ്പെടുത്തി. നാളെ രാവിലെ എഴിന് നടക്കുന്ന ആദ്യസെമിയിൽ അരുവിത്തറ കോളേജ് മാവേലിക്കര ബിഷപ്പ് മൂർ കോളേജിനെയും എട്ടരയ്ക്ക് നടക്കുന്ന രണ്ടാമത്തെ സെമിയിൽ ക്രൈസ്റ്റ് മട്ടന്നൂർ പിആർഎൻഎസ് നെയും നേരിടും. വൈകീട്ട് മൂന്നിന് ലൂസേഴ്സ് ഫൈനലും നാലിന് ഫൈനൽ മൽസരവും നടക്കും. ഉച്ചയ്ക്ക് നടന്ന ചടങ്ങിൽ നഗരസഭ ചെയർപേഴ്സൺ സുജ സഞ്ജീവ്കുമാർ ടൂർണ്ണമെൻ്റ് ഉദ്ഘാടനം ചെയ്തു. പ്രിൻസിപ്പൽ ഫാ ജോളി ആൻഡ്രൂസ് അധ്യക്ഷത വഹിച്ചു.
