കരുവന്നൂരിൽ പട്ടാപ്പകൽ വീടു കയറി ആക്രമണം; ഒരു കുടുംബത്തിലെ നാലു പേര്‍ക്ക് പരിക്ക്…
ഇരിങ്ങാലക്കുട: പട്ടാപ്പകൽ വീടു കയറി വൃദ്ധയെയും മകനെയും മരുമകളെയും പേരക്കുട്ടിയെയും മര്‍ദിച്ചു. കരുവന്നൂര്‍ പുത്തന്‍തോട് ഷാപ്പിനു സമീപം വാടകയ്ക്ക് താമസിക്കുന്ന വെള്ളാനി വീട്ടില്‍ ഓമനയുടെ വീട്ടിലാണ് ഉച്ചക്ക് ഒന്നരയോടെ ആക്രമണമുണ്ടായത്. കരുവന്നൂര്‍ ജനത കോളനിയില്‍ കുന്നമത്ത് വീട്ടില്‍ അനൂപ് എന്ന് പേരുള്ള അക്കുടു(28) ആണ് ആക്രമണം നടത്തിയതെന്ന് വീട്ടുകാർ പറഞ്ഞു. വെള്ളാനി വീട്ടില്‍ വീട്ടില്‍ ഓമന(51), മരുമകന്‍ കുട്ടാട്ടില്‍ വീട്ടല്‍ സൗമേഷ്(34), മകള്‍ അഞ്ജന(27), പേരക്കുട്ടി പ്രാര്‍ഥന(ആറ്) എന്നിവര്‍ക്കാണ് പരിക്കേറ്റത്. വീട്ടില്‍ കയറി വടിവാള്‍ വീശി ഭീകരാന്തരീക്ഷം സൃഷ്ടിച്ചാണ് ആക്രമണം നടത്തിയത്. ലഹരിയില്‍ വടിവാളുമായി സ്‌കൂട്ടറില്‍ വീട്ടിലെത്തിയ യുവാവ് വാടകയ്ക്ക് താമസിക്കുന്ന ഇവരുടെ വീടിന്റെ ഗേറ്റ് ഇടിച്ച് തുറക്കുകയായിരുന്നു. പരിക്കേറ്റ ഇവര്‍ ഇരിങ്ങാലക്കുട ജനറല്‍ ആശുപത്രിയില്‍ ചികിത്സ തേടി. ഇരിങ്ങാലക്കുട പോലീസും സ്ഥലത്തെത്തി പ്രതിക്കായുള്ള അന്വേഷണം ആരംഭിച്ചു. മുമ്പും ഇയാളില്‍ നിന്നും നിരവധി തവണ ഇത്തരം അനുഭവങ്ങള്‍ ഉണ്ടായിട്ടുണ്ടെന്നും പോലീസില്‍ പരാതി നല്‍കിയിട്ടും ഫലമുണ്ടായിട്ടില്ലെന്നും വീട്ടുകാര്‍ പറഞ്ഞു.
