ഇരിങ്ങാലക്കുട ചെട്ടിപ്പറമ്പിൽ സ്വകാര്യബസില്‍ നിന്നും തെറിച്ച് വീണ് ഗൃഹനാഥന് പരിക്കേറ്റു..
ഇരിങ്ങാലക്കുട: ബസില്‍ നിന്നും തെറിച്ച് വീണ് ഗൃഹനാഥന് പരിക്കേറ്റു. ഇരിങ്ങാലക്കുട ചെട്ടിപ്പറമ്പില്‍ നിന്നും ബസ്റ്റാന്‍ഡിലേക്കുള്ള വണ്‍വേയിലേക്ക് തിരിയുന്നിടത്തു വച്ചാണ് രാവിലെ ഒമ്പത് മണിയോടെ അപകടം സംഭവിച്ചത്. ഇരിങ്ങാലക്കുട കുരിശങ്ങാടി സ്വദേശി കുറ്റിക്കാടന്‍ വീട്ടില്‍ പോളി(60)ക്കാണ് പരിക്കേറ്റത്. തൃശൂര്‍ പോകുന്നതിനായി ചന്തക്കുന്നില്‍ നിന്നും ബസില്‍ കയറിയതാണ് പോളി. അമിതവേഗതയില്‍ ബസ് വളവ് തിരിയുന്നതിനിടയിലാണ് പിറകുവശത്തെ ചവിട്ടുപടിയില്‍ നിന്നും പോളി തെറിച്ച് വീണത്. ഈ സമയം ബസിന്റെ വാതില്‍ അടച്ചിരുന്നില്ല. അപകടം സംഭവിച്ചയുടനെ ബസ് ജീവനക്കാര്‍ തന്നെ ഇദ്ദേഹത്തെ ഇരിങ്ങാലക്കുട സഹകരണ ആശുപത്രിയില്‍ എത്തിച്ചു. പരിശോധനയില്‍ ഗുരുതരപരിക്കുകളില്ലെന്നു ഡോക്ടര്‍മാര്‍ അറിയിച്ചു.
