ഇരിങ്ങാലക്കുട കോടതി പരിസരത്ത് വെച്ച് ഭാര്യയെ കുത്തികൊലപ്പെടുത്താൻ ശ്രമിച്ച താണിശ്ശേരി സ്വദേശിയായ പ്രതി അറസ്റ്റിൽ …
ഇരിങ്ങാലക്കുട :ഇരിങ്ങാലക്കുട സിവിൽ സ്റ്റേഷൻ കോമ്പൗണ്ടിനകത്ത് വെച്ച് ഭാര്യയെ കത്തി കൊണ്ട് കുത്തി ഗുരുതരമായി പരിക്കേൽപ്പിച്ച് കൊലപ്പെടുത്താൻ ശ്രമിച്ച പ്രതിയായ താണിശ്ശേരി വൻപറമ്പിൽ വീട്ടിൽ സജിമോൻ (55) എന്നയാളെ ഇരിങ്ങാലക്കുട ഡിവൈഎസ്പി ടി കെ ഷൈജുവിൻറ നിർദ്ദേശാനുസരണം സി ഐ അനീഷ് കരീം, എസ് ഐ ഷാജൻ എം എസ് ,ജലീൽ എം കെ എന്നിവരുടെ നേതൃത്വത്തിലുള്ള പോലീസ് സംഘം അറസ്റ്റ് ചെയ്തു. സജിമോനും ഭാര്യ രശ്മിയും തമ്മിലുള്ള വിവാഹമോചന കേസ് ഇരിങ്ങാലക്കുട കുടുംബ കോടതിയിൽ നടക്കുന്നുണ്ട്. ഈ മാസം 25 ന് കേസിന്റെ വിചാരണക്കായി രശ്മി കോടതിയിലെത്തിയ സമയം ഡൈവോഴ്സ് കേസു കൊടുത്തതിലുള്ള വിരോധത്താൽ സജിമോൻ രശ്മിയെ തടഞ്ഞു നിർത്തി കയ്യിൽ കരുതിയിരുന്ന കത്തി കൊണ്ട് വയറിലും, പുറത്തും, കയ്യിലും കുത്തുകയായിരുന്നു. കോടതി ഡ്യൂട്ടിയിലുണ്ടായിരുന്ന നിഫാദ്, ബിജു എന്നീ പോലീസുദ്യോഗസ്ഥരാണ് പ്രതിയെ തടഞ്ഞത്.പ്രതിയുടെ പേരിൽ കൊടകര, മാള, വലപ്പാട് എന്നീ സ്റ്റേഷനുകളിലും കേസുകളുണ്ട്. ഗുരുതരമായി പരിക്കു പറ്റിയ രശ്മി തൃശ്ശൂർ മെഡിക്കൽ കോളേജ് ആശുപത്രി ഐസിയു വിൽ ചികിത്സയിലാണ്. സീനിയർ സിവിൽ പോലീസ് ഓഫീസർമാരായ ഉമേഷ് കെ. വി, രാഹുൽ അമ്പാടൻ, സിപിഒ ലികേഷ് എന്നിവരും അന്വേഷണ സംഘത്തിലുണ്ടായിരുന്നു. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.
