നഗര മധ്യത്തിലെ പറമ്പിൽ വന്‍ തീപിടുത്തം; തീയണച്ചത് രണ്ട് മണിക്കൂർ നേരത്തെ ശ്രമങ്ങൾക്ക് ഒടുവിൽ
ഇരിങ്ങാലക്കുട: നഗര മധ്യത്തിലെ പറമ്പില്‍ വന്‍ തീപിടുത്തം. തിങ്കളാഴ്ച രാത്രി ഏഴുമണിക്കാണ് സംഭവം. ഇരിങ്ങാലക്കുട തെക്കേ അങ്ങാടിയില്‍ നിന്നും കോമ്പാറയ്ക്ക് പോകുന്ന വഴിയിലെ പറമ്പിലാണ് തീപിടുത്തം ഉണ്ടായത്. പൊക്കത്ത് വീട്ടില്‍ ആന്റോ, പൊക്കത്ത് വീട്ടില്‍ ജോണ്‍സണ്‍, ഐക്കരവീട്ടില്‍ ഐ.സി മേനോന്‍ എന്നിവരുടെ പറമ്പിലാണ് തീപടര്‍ന്നത്. മൂന്നു ഏക്കറോളം വരുന്ന പറമ്പിലെ ഉണക്ക പുല്ലും പൊന്തക്കാടും കത്തി നശിച്ചു. ഇരിങ്ങാലക്കുട ഫയര്‍ ഫോഴ്‌സ് സംഘം എത്തിയാണ് തീ അണച്ചത്. രണ്ട് മണിക്കൂര്‍ നീണ്ട പരിശ്രമങ്ങള്‍ക്ക് ശേഷമാണ് തീ അണക്കുവാന്‍ സാധിച്ചത്. ഇരിങ്ങാലക്കുട ഫയര്‍ഫോഴ്‌സ് സീനിയര്‍ ഓഫീസര്‍ എസ് സജയന്‍, അസിസ്റ്റന്റ് സ്‌റ്റേഷന്‍ ഓഫീസര്‍ കെ.സി സജീവ്, ഓഫീസര്‍മാരായ ടി.ടി പ്രദീപ്, ഉല്ലാസ്.എം ഉണ്ണികൃഷ്ണന്‍ എന്നിവരുടെ നേതൃത്വത്തിലുള്ള സംഘമാണ് തീ അണച്ചത്.
