മികച്ച ഗ്രാമപഞ്ചായത്ത് പ്രസിഡന്റിനുള്ള അവാർഡ് ആളൂർ പഞ്ചായത്ത് പ്രസിഡണ്ടിന് സമ്മാനിച്ചു.
ഇരിങ്ങാലക്കുട : എറണാകുളം കേന്ദ്രീകരിച്ച് പ്രവർത്തിക്കുന്ന കേരള യൂത്ത് ഗൈഡൻസ് മൂവ്മെൻ്റിൻ്റെ തൃശ്ശൂർ ജില്ലയിലെ മികച്ച പഞ്ചായത്ത് പ്രസിഡണ്ടിനുള്ള അവാർഡ് ആളൂർ ഗ്രാമപഞ്ചായത്ത് പ്രസിഡന്റ് കെ ആർ ജോജോക്ക് സമ്മാനിച്ചു. മൊമൻ്റോയും 25000 രൂപ ക്യാഷ് അവാർഡും അടങ്ങുന്നതാണ് അവാർഡ്. ആളൂർ പഞ്ചായത്ത് കമ്മ്യൂണിറ്റി ഹാളിൽ നടന്ന ചടങ്ങിൽ മുൻ ജില്ലാ പഞ്ചായത്ത് പ്രസിഡന്റ് പി കെ ഡേവിസ് മാസ്റ്റർ അധ്യക്ഷത വഹിച്ചു.യോഗത്തിൽ ഉന്നതവിദ്യാഭ്യാസ സാമൂഹ്യ നീതി വകുപ്പ് മന്ത്രി ഡോ ആർ ബിന്ദു അവാർഡ് സമർപ്പണം നിർവഹിച്ചു. രൂപത ബിഷപ്പ് മാർ പോളി കണ്ണൂക്കാടൻ, മുൻ ശബരിമല മേൽശാന്തി ഉണ്ണികൃഷ്ണൻ നമ്പൂതിരി, കല്ലെറ്റുംകര ജുമാ മസ്ജിദ് ഇമാം കുഞ്ഞുമുഹമ്മദ് മളാഹിരി, മഞ്ഞപ്ര പഞ്ചായത്ത് പ്രസിഡന്റ് വത്സലകുമാരി വേണു, പഞ്ചായത്ത് വൈസ് പ്രസിഡന്റ് രതി സുരേഷ്, സ്റ്റാൻഡിങ് കമ്മിറ്റി ചെയർമാൻ ജോസ് മാഞ്ഞൂരാൻ, സിപിഐ എം മാള ഏരിയ സെക്രട്ടറി ടി കെ സന്തോഷ്‌, സിപിഐ മണ്ഡലം സെക്രട്ടറിയേറ്റ് മെമ്പർ എം ബി ലത്തീഫ്,യൂത്ത് ഗൈഡൻസ് പ്രഥമ അവാർഡ് ജേതാവായ ടി പി വേണു, എസ്എൻഡിപി കൊടകര യൂണിയൻ സെക്രട്ടറി കെ ആർ ദിനേശൻ , യൂത്ത് ഗൈഡൻസ് മൂവ്മെൻ്റ് ജില്ലാ സെക്രട്ടറി സേവ്യർ പാലാട്ടി എന്നിവർ സംസാരിച്ചു. അവാർഡ് ജേതാവ് കെ ആർ ജോജോ മറുപടി പ്രസംഗവും, സംഘാടക സമിതി കൺവീനർ കെ ബി സുനിൽ നന്ദിയും പറഞ്ഞു.
