എ പ്ലസ് ഗ്രേഡ് നേട്ടം നിലനിർത്തി ഇരിങ്ങാലക്കുട മഹാത്മാഗാന്ധി റീഡിങ് റൂം ആൻഡ് ലൈബ്രറി ; താലൂക്കിൽ നാല് ലൈബ്രറികൾക്ക് എ ഗ്രേഡ് ; എസ്എൻവൈഎസ് ലൈബ്രറിക്ക് സി ഗ്രേഡ്
ഇരിങ്ങാലക്കുട : സംസ്ഥാന ലൈബ്രറി കൗൺസിലിൻ്റെ ഗ്രഡേഷനിൽ ഇരിങ്ങാലക്കുട മഹാത്മാഗാന്ധി റീഡിങ് റൂം ആൻഡ് ലൈബ്രറി ക്ക് വീണ്ടും എ പ്ലസ് നേട്ടം. ജില്ലയിൽ എട്ട് ലൈബ്രറികൾക്കാണ് ഇത്തവണ എ പ്ലസ് ഗ്രേഡ് ലഭിച്ചിട്ടളളത്. 2018 -19 മുതൽ തൃശ്ശൂർ ജില്ലയിൽ എ പ്ലസ് ഗ്രേഡ് പട്ടികയിൽ മഹാത്മ ലൈബ്രറി ഇടം പിടിച്ചിട്ടുണ്ട്.ബാലവേദി,വനിതാവേദി,യുവത,വയോജന വിഭാഗം,കലാസാംസ്കാരിക വിഭാഗം,കായിക വിഭാഗം,ലഹരി വിരുദ്ധ ക്ലബ്ബ്,അക്ഷര സേന , വായനാ മത്സരങ്ങൾ,സർഗോത്സവങ്ങൾ എന്നിവയിലെ സ്ഥിരം സാന്നിധ്യം താലൂക്ക് ജില്ലാ സംസ്ഥാന ലൈബ്രറി കൗൺസിലുകളുടെ എല്ലാ നിർദ്ദേശങ്ങളും പരിപാടികളും നടപ്പാക്കിയത് ലൈബ്രറിക്ക് തുണയായി.
എ പ്ലസ് ഗ്രേഡ് ലഭിച്ച മുകുന്ദപുരം താലൂക്കിലെ ഏക ലൈബ്രറിയും മഹാത്മാഗാന്ധി റീഡിങ് റൂം ആൻഡ് ലൈബ്രറിയാണ്.1889 സ്ഥാപിതമായ മഹാത്മാഗാന്ധി ലൈബ്രറിക്ക് ആശാ പി സി സെക്രട്ടറിയും അഡ്വക്കേറ്റ് അജയ്കുമാർ കെ ജിയും ഉൾപ്പെട്ട 15 അംഗ എക്സിക്യൂട്ടീവ് കമ്മിറ്റിയാണ് നേതൃത്വം നൽകുന്നത്.
താലൂക്കിൽ പട്ടേപ്പാടം താഷ്കൻ്റ് ലൈബ്രറി, പുത്തൻചിറ ഗ്രാമീണവായനശാല, അവിട്ടത്തൂർ സ്പേസ് ലൈബ്രറി, ഇരിങ്ങാലക്കുട എസ് എൻ ലൈബ്രറി എന്നിവയ്ക്കാണ് എ ഗ്രേഡ് ഉള്ളത്. ഇരിങ്ങാലക്കുട വിശ്വനാഥപുരം ക്ഷേത്രത്തോട് അനുബന്ധിച്ച് എസ്എൻബിഎസ് സമാജത്തിൻ്റെ കീഴിലുള്ള എസ്എൻവൈഎസ് ലൈബ്രറിക്ക് സി ഗ്രേഡ് ആണ് ലഭിച്ചിരിക്കുന്നത്.
