കേരള സ്റ്റേറ്റ് ചെസ്സ് ഇൻ സ്കൂൾ ചാംപ്യൻഷിപ്പ് നവംബർ 23, 24 തീയതികളിൽ ഇരിങ്ങാലക്കുടയിൽ; പങ്കെടുക്കുന്നത് വിവിധ ജില്ലകളിൽ നിന്നുമായി തിരഞ്ഞെടുക്കപ്പെട്ട 500 ഓളം കളിക്കാർ
ഇരിങ്ങാലക്കുട : നവംബർ 23, 24 തീയതികളിൽ ഇരിങ്ങാലക്കുടയിൽ നടക്കുന്ന സംസ്ഥാന ചെസ്സ് ചാമ്പ്യൻഷിപ്പിനുള്ള ഒരുക്കങ്ങൾ പൂർത്തിയായി. ചെസ്സ് അസോസിയേഷൻ കേരളയുടെ നേതൃത്വത്തിൽ ലയൺസ് ക്ലബ്ബിന്റെ സഹകരണത്തോടെ സെൻ്റ് ജോസഫ്സ് കോളേജിൽ നടക്കുന്ന മൽസരങ്ങൾ ക്ലബ് 318 ഡി ഡിസ്ട്രിക്ട് ഗവർണർ ജെയിംസ് വളപ്പില ഉദ്ഘാടനം ചെയ്യും. കേരളത്തിലെ എല്ലാ ജില്ലകളിൽ നിന്നുമായി തിരഞ്ഞെടുക്കപ്പെട്ട 500 ഓളം കളിക്കാർ ടൂർണമെൻ്റിൽ പങ്കെടുക്കുമെന്ന് ചെസ്സ് അസോസിയേഷൻ ജില്ലാ സെക്രട്ടറി പീറ്റർ ജോസഫ്, ലയൺസ് ക്ലബ് പ്രസിഡണ്ട് ബിജു ജോസ് കൂനൻ, കോ-ഓർഡിനേറ്റർ പോൾ തോമസ് മാവേലി, സോൺ ചെയർപേഴ്സൺ അഡ്വ ജോൺ നിധിൻ തോമസ് എന്നിവർ പത്ര സമ്മേളനത്തിൽ അറിയിച്ചു. പന്ത്രണ്ട് വിഭാഗങ്ങളിലായി നടക്കുന്ന മൽസരങ്ങളിൽ നിന്നും തിരഞ്ഞെടുക്കപ്പെടുന്നവർ ദേശീയ ചെസ്സ് ഇൻ സ്കൂൾ മൽസരങ്ങളിൽ കേരളത്തെ പ്രതിനിധീകരിക്കും. വിജയികൾക്ക് സർട്ടിഫിക്കറ്റുകളും ക്യാഷ് അവാർഡുകളും ട്രോഫികളും സമ്മാനിക്കുമെന്നും സംഘാടകർ അറിയിച്ചു.
