ലിമിറ്റഡ് സ്റ്റോപ്പ് ബസ്സിടിച്ച് സ്കൂട്ടറിൽ സഞ്ചരിക്കുകയായിരുന്ന ദമ്പതികൾക്ക് പരിക്കേറ്റു; നിയന്ത്രണം വിട്ട ബസ്സിടിച്ച് കപ്പേളയുടെ ഭണ്ഡാരവും തകർന്നു.
ഇരിങ്ങാലക്കുട : ലിമിറ്റഡ് സ്റ്റോപ്പ് ബസ്സിടിച്ച് സ്കൂട്ടറിൽ സഞ്ചരിക്കുകയായിരുന്ന ദമ്പതികൾക്ക് പരിക്കേറ്റു. മാപ്രാണം കപ്പേളയ്ക്ക് മുൻപിൽ ഞായറാഴ്ച രാവിലെ പത്ത് മണിയോടെ ആയിരുന്നു അപകടം. ഇരിങ്ങാലക്കുടയിൽ നിന്നും തൃശ്ശൂരിലേക്ക് പോവുകയായിരുന്ന റാംജി എന്ന ബസ്സ് സ്കൂട്ടറിൽ ഇടിച്ച് ചാലക്കുടി തിരുത്തിപ്പറമ്പ് സ്വദേശികളായ നായത്തോടൻ വീട്ടിൽ വർഗ്ഗീസ് (65) ഭാര്യ മേരി (63 )എന്നിവർക്കാണ് പരിക്കേറ്റത്. ഇവരെ തൃശ്ശൂരിലെ സ്വകാര്യ ആശുപത്രിയിൽ പ്രവേശിപ്പിച്ചു. ഇരിങ്ങാലക്കുടയിൽ നിന്നും വരികയായിരുന്ന ദമ്പതികൾ ഇൻഡിക്കേറ്റർ ഇട്ട് മാപ്രാണം ഭാഗത്തേക്ക് തിരിയാൻ ശ്രമിക്കുന്നതിനിടയിൽ ആയിരുന്നു അപകടം എന്ന് നാട്ടുകാർ പറഞ്ഞു. നിയന്ത്രണം വിട്ട ബസ് കപ്പേളയ്ക്ക് അടുത്ത് നിറുത്തിയിട്ടിരുന്ന സ്കൂട്ടറിലും കപ്പേളയുടെ ഭണ്ഡാരത്തിലും മതിലിലും ഇടിച്ചാണ് നിന്നത്. അപകടത്തിൽ ഭണ്ഡാരവും മതിലും തകർന്നതായും 60000 രൂപയുടെ നഷ്ടം ഉണ്ടായതായും മാപ്രാണം ഹോളി ക്രോസ്സ് ചർച്ച് അധികൃതർ പറഞ്ഞു. ഇത് സംബന്ധിച്ച് പോലീസിൽ പരാതിയും നൽകിയിട്ടുണ്ട്.
