വിദ്യാർഥികളെ ആദരിച്ച് പ്രസ് ക്ലബ്; പൊതുവിദ്യാഭ്യാസമേഖലയെ പുഷ്ടിപ്പെടുത്തി നിറുത്തുന്നതിൽ സമൂഹത്തിന് നിർണ്ണായക പങ്കെന്ന് മന്ത്രി ഡോ ആർ ബിന്ദു….
ഇരിങ്ങാലക്കുട : പൊതുവിദ്യാഭ്യാസ മേഖലയെ പുഷ്ടിപ്പെടുത്തി നിറുത്തുന്നതിൽ സമൂഹത്തിന് നിർണ്ണായകമായ പങ്കാണുള്ളതെന്ന് ഉന്നത വിദ്യാഭ്യാസ വകുപ്പ് മന്ത്രി ഡോ ആർ ബിന്ദു.ഇരിങ്ങാലക്കുട പ്രസ്സ് ക്ലബിൻ്റെ ആഭിമുഖ്യത്തിൽ എസ്എസ്എൽസി, പ്ലസ് ടു, വിഎച്ച്എസ്ഇ പരീക്ഷകളിൽ ഉന്നതവിജയം നേടിയ ഗവ. ബോയ്സ് ഹയർ സെക്കൻഡറി സ്കൂളിലെ വിദ്യാർഥികളെ ആദരിക്കുന്ന ചടങ്ങിൻ്റെ ഉദ്ഘാടനം നിർവഹിച്ച് സംസാരിക്കുകയായിരുന്നു മന്ത്രി . സാമൂഹ്യനീതി എന്ന ആശയം ഉയർത്തിപ്പിടിക്കുന്ന പൊതുവിദ്യാലയങ്ങളിലെ വിദ്യാർഥികൾ നവകേരളത്തെ മുന്നിൽ നിന്നും നയിക്കുന്നവരായി മാറണമെന്നാണ് സർക്കാർ ആഗ്രഹിക്കുന്നതെന്നും മന്ത്രി പറഞ്ഞു. സ്കൂൾ ഓഡിറ്റോറിയത്തിൽ നടന്ന ചടങ്ങിൽ ക്ലബ് പ്രസിഡണ്ട് പി ശ്രീനിവാസൻ അധ്യക്ഷനായിരുന്നു. അഭിഷേക് എൻ ആർ , അനുഗ്രഹ ടി എം , കെ എസ് ശ്രീപ്രിയ എന്നിവർക്ക് മന്ത്രി പുരസ്കാരങ്ങൾ സമ്മാനിച്ചു. വിഎച്ച്എസ്ഇ പ്രിൻസിപ്പൽ ആർ രാജലക്ഷ്മി,സ്കൂൾ ഹെഡ്മിസ്ട്രസ്സ് ടി കെ ലത, പിടിഎ പ്രസിഡന്റ് വി ആർ ബിനോയ് എന്നിവർ ആശംസകൾ നേർന്നു. ഹയർ സെക്കൻഡറി പ്രിൻസിപ്പൽ എം കെ മുരളി സ്വാഗതവും ക്ലബ് സെക്രട്ടറി നവീൻ ഭഗീരഥൻ നന്ദിയും പറഞ്ഞു. ക്ലബ് വൈസ്- പ്രസിഡണ്ട് കെ എ റിയാസുദ്ദീൻ, ട്രഷറർ ഷാജൻ ചക്കാലക്കൽ, എക്സിക്യൂട്ടീവ് അംഗം വി ആർ സുകുമാരൻ തുടങ്ങിയവർ പങ്കെടുത്തു.
