തുമ്പൂർ 33 KV സബ്-സ്റ്റേഷൻ യാഥാർഥ്യത്തിലേക്ക്; പദ്ധതിയുടെ പ്രയോജനം ആളൂർ, മുരിയാട്, വേളൂക്കര, പുത്തൻചിറ പഞ്ചായത്തുകളിൽ നിന്നുള്ള കാൽലക്ഷത്തോളം ഗുണഭോക്താക്കൾക്ക്…
ഇരിങ്ങാലക്കുട : ആളൂർ, മുരിയാട്, വേളൂക്കര, പുത്തൻചിറ പഞ്ചായത്തുകളിലെ വൈദ്യുതി തടസ്സങ്ങൾക്കും വോൾട്ടേജ് ക്ഷാമത്തിനും പരിഹാരമായുള്ള തുമ്പൂർ 33 KV സബ്-സ്റ്റേഷൻ യാഥാർഥ്യത്തിലേക്ക്. നാല് പഞ്ചായത്തുകളിലെ കാൽ ലക്ഷത്തോളം ഉപഭോക്താക്കൾക്കാണ് പദ്ധതിയുടെ പ്രയോജനം ലഭിക്കുക. കെഎസ്ഇബി യുടെ 805 ലക്ഷം രൂപ ചിലവഴിച്ചാണ് പദ്ധതി പൂർത്തീകരിച്ചിട്ടുള്ളത്.വേളൂക്കര പഞ്ചായത്തിലെ പതിനൊന്നും വാർഡിലാണ് തുമ്പൂർ സബ് – സ്റ്റേഷൻ നിർമ്മിച്ചിട്ടുള്ളത്. നേരത്തെ വൈദ്യുതി വിതരണത്തിന് പ്രസ്തുത പ്രദേശങ്ങൾ ഇരിങ്ങാലക്കുട സബ് സ്റ്റേഷനെയാണ് ആശ്രയിച്ചിരുന്നത്. ഇരിങ്ങാലക്കുട സബ് – സ്റ്റേഷനിൽ നിന്നുള്ള 11 കെവി ലൈനിന് പകരം 33 KV ലൈൻ വലിച്ച് തുമ്പൂരിൽ എത്തിച്ചാണ് പദ്ധതി യാഥാർഥ്യമാക്കിയിരിക്കുന്നത്. തുമ്പൂർ സബ് – സ്റ്റേഷനിൽ നിന്നും പുതിയ നാല് ഫീഡറുകളും ഈ സർക്കിളിൽ സൃഷ്ടിച്ചിട്ടുണ്ട്. പതിനൊന്നാം വാർഡിൽ തുമ്പൂർ സെൻ്ററിന് അടുത്ത് പുത്തൻവെട്ടുവഴി റോഡിനോട് ചേർന്നുള്ള അമ്പത് സെൻ്റ് സ്ഥലം നേരത്തെ സ്വകാര്യ വ്യക്തിയിൽ നിന്നും ബോർഡ് വാങ്ങിച്ചിരുന്നു. 2020 ലാണ് പദ്ധതിയുടെ നിർമ്മാണ പ്രവർത്തനങ്ങൾക്ക് തുടക്കം കുറിച്ചത്.
