ശാസ്ത്ര നോവൽ രചനയിലൂടെ ശ്രദ്ധ നേടി ഇരിങ്ങാലക്കുട ലിറ്റിൽ ഫ്ളവർ ഹയർ സെക്കൻഡറി സ്കൂളിലെ പത്താം ക്ലാസ് വിദ്യാർത്ഥിനി; കുട്ടിക്കാലം മുതലേയുള്ള വായന എഴുത്തിൻ്റെ വഴികളിലേക്കുളള കാരണമായെന്ന് എഴുത്തുകാരി….
ഇരിങ്ങാലക്കുട : കുട്ടിക്കാലം മുതൽ ഉള്ള വായനയുടെയും കാഴ്ചകളിൽ നിറഞ്ഞ ശാസ്ത്ര സിനിമകളുടെയും തുടർച്ചയായി ശാസ്ത്ര നോവൽ എഴുതി ശ്രദ്ധ നേടുകയാണ് പത്താം ക്ലാസ്സ് വിദ്യാർഥിനി . ഇരിങ്ങാലക്കുട തുറവൻകാട് ആലപ്പാട്ട് വീട്ടിൽ ഷിനോയിയുടെയും റിസയുടെയും മകളും ഇരിങ്ങാലക്കുട ലിറ്റിൽ ഫ്ളവർ ഹയർ സെക്കൻഡറി സ്കൂളിലെ പത്താം ക്ലാസ്സ് വിദ്യാർഥിനിയുമായ സിൻഡ്രെല്ലയാണ് ” എബി ഓറാഗേ ബി ” എന്ന സയൻസ് ഫിക്ഷനൽ ഫാമിലി ക്ലാസ്സിക് ഡ്രാമ വിഭാഗത്തിൽ ഉൾപ്പെടുന്ന ഇംഗ്ലീഷ് നോവൽ രചിച്ചിരിക്കുന്നത്. ഒൻപത് വർഷം മുമ്പ് വിട പറഞ്ഞ തൻ്റെ അച്ഛൻ്റെ ഓർമ്മകളിൽ കഴിയുന്ന പത്തൊൻപതുകാരിയും അസാധാരണമായ സ്വപ്നങ്ങൾ കാണുകയും ചെയ്യുന്ന കാതറിൻ ആണ് പതിനഞ്ച് അധ്യായങ്ങളിലായിട്ടുള്ള നോവലിലെ മുഖ്യ കഥാപാത്രം . ഒന്നരമാസം മുമ്പ് കാണാതായ തൻ്റെ സഹോദരി നൗറയെക്കുറിച്ചുള്ള അന്വേഷണങ്ങൾ കാതറിനെ എബി ഓറാഗേ ബി എന്ന ഗ്രഹത്തിലാണ് കൊണ്ട് എത്തിക്കുന്നതാണ് നോവലിൻ്റെ ഉള്ളടക്കമായി വരുന്നത്. ബാലപ്രസിദ്ധീകരണങ്ങളിൽ നിന്നും തുടങ്ങി ഓൺലൈൻ ആപ്പുകൾ വഴിയുള്ള നിരന്തരമായ വായനയാണ് മകളുടേതെന്ന് രക്ഷിതാക്കൾ പറയുന്നു. ശാസ്ത്ര രചനകളും സമാന സ്വഭാവമുള്ള ചലച്ചിത്രങ്ങളും എറെ ഇഷ്ടപ്പെടുന്ന സിൻഡ്രല്ല ബഹിരാകാശ സഞ്ചാരിയാകാനാണ് ലക്ഷ്യമിടുന്നത്. വായനയും എഴുത്തും തൻ്റെ അഭിനിവേശമാണെന്ന വ്യക്തമാക്കുന്ന സിൻഡ്രല്ല പുതിയ നോവലിൻ്റെ പണിപ്പുരയിലാണിപ്പോൾ.
