സുധ ദിലീപ് വെള്ളാങ്ങല്ലൂർ ബ്ലോക്ക് പഞ്ചായത്ത് പ്രസിഡന്റ്; മാറ്റം ഭരണകക്ഷിയായ എൽഡിഎഫിലെ ധാരണപ്രകാരം …
ഇരിങ്ങാലക്കുട : വെള്ളാങ്ങല്ലൂർ ബ്ലോക്ക് പഞ്ചായത്ത് പ്രസിഡന്റ് ആയി സിപിഐ യിലെ സുധ ദിലീപിനെ തിരഞ്ഞെടുത്തു. ഭരണകക്ഷിയായ എൽഡിഎഫിലെ ധാരണപ്രകാരം സിപിഎമ്മിൽ നിന്നുള്ള വിജയലക്ഷ്മി വിനയചന്ദ്രൻ പ്രസിഡണ്ട് സ്ഥാനം ഒഴിഞ്ഞതിനെ തുടർന്നാണ് തിരഞ്ഞെടുപ്പ് വേണ്ടി വന്നത്. ബ്ലോക്ക് ഹാളിൽ നടന്ന തിരഞ്ഞെടുപ്പിൽ സുധ ദിലീപിന് 9 ഉം പ്രതിപക്ഷത്ത് നിന്ന് മൽസരിച്ച തുമ്പൂർ ഡിവിഷൻ മെമ്പർ ടെസ്സി ജോയി കൊടിയന് 2 ഉം വോട്ട് ലഭിച്ചു. ഒൻപത് വോട്ട് കിട്ടിയ സുധ ദിലീപ് തിരഞ്ഞെടുക്കപ്പെട്ടതായി വരണാധികാരിയും ജില്ലാ പട്ടികജാതി വികസന ഓഫീസറുമായ ഉഷ കെ നായർ പ്രഖ്യാപിച്ചു. പടിയൂർ പഞ്ചായത്തിലെ എടതിരിഞ്ഞി ഡിവിഷനിൽ നിന്നും തിരഞ്ഞെടുക്കപ്പെട്ട സുധ ദിലീപ് ഈ ഭരണസമിതിയിൽ ആദ്യ ഇരുപത് മാസം വൈസ്-പ്രസിഡണ്ട് ആയും തുടർന്ന് പത്ത് മാസം ആരോഗ്യ വിദ്യാഭ്യാസ സ്റ്റാന്റിംഗ് കമ്മിറ്റി ചെയർപേഴ്സനായും പ്രവർത്തിച്ചിട്ടുണ്ട്. സിപിഐ പടിയൂർ നോർത്ത് ലോക്കൽ കമ്മിറ്റി അംഗം, മഹിളാസംഘം ഇരിങ്ങാലക്കുട മണ്ഡലം ജോയിൻ്റ് സെക്രട്ടറി എന്നീ നിലകളിൽ പ്രവർത്തിച്ചു വരികയാണ്. ദിലീപ് ഭർത്താവും ഹരികൃഷ്ണൻ, യാദവ് എന്നിവർ മക്കളുമാണ്.
