കഥകളി ലോകത്ത് അഞ്ചു പതിറ്റാണ്ടുകളായി സാന്നിധ്യം; കലാനിലയം ഗോപിയാശാനെ വീര ശ്യംഖലയും ഗുരുദക്ഷിണയും നൽകി ശിഷ്യർ ആദരിക്കുന്നു….
ഇരിങ്ങാലക്കുട : കഥകളി ലോകത്ത് അഞ്ച് പതിറ്റാണ്ടുകളായി നിറഞ്ഞ് നില്ക്കുന്ന കലാനിലയം ഗോപിയാശാനെ ശിഷ്യരുടെ നേത്യത്വത്തിൽ വീര ശ്യംഖലയും ഗുരുദക്ഷിണയും നൽകി ആദരിക്കുന്നു. ഇരിങ്ങാലക്കുട ശാന്തിനികേതൻ സ്കൂളിൽ മെയ് 18, 19 ദിവസങ്ങളിൽ സോപാന സംഗീതം, നൃത്തയോഗ, കേളി, കഥകളി പരമ്പര, ജുഗൽബന്ദി, ശിഷ്യ – സുഹ്യദ് സംഗമം, മോഹിനിയാട്ടക്കച്ചേരി, സമാദരണ സമ്മേളനം എന്നീ പരിപാടികൾ ഇതോടനുബന്ധിച്ച് നടക്കുമെന്ന് സംഘാടകരും ഗോപിയാശാൻ്റെ ശിഷ്യരുമായ വിനോദ് വാരിയർ, അഡ്വ പി മണികണ്ഠൻ, ഗിരിജ മാധവൻ, കിഷോർ പള്ളിപ്പാട്ട്, വി ജി ഉഷ എന്നിവർ പത്ര സമ്മേളനത്തിൽ അറിയിച്ചു. 19 ന് വൈകീട്ട് നാലിന് നടക്കുന്ന സമാദരണ സമ്മേളനം ഉന്നത വിദ്യാഭ്യാസ വകുപ്പ് മന്ത്രി ഡോ ആർ ബിന്ദു ഉദ്ഘാടനം ചെയ്യും. പ്രൊഫ വി കെ ലക്ഷ്മണൻനായർ അധ്യക്ഷത വഹിക്കുന്ന ചടങ്ങിൽ കേരള സംഗീത നാടക അക്കാദമി ചെയർമാൻ മട്ടന്നൂർ ശങ്കരൻകുട്ടിമാരാർ മുഖ്യപ്രഭാഷണം നിർവഹിക്കും. ഗുരുക്കൻമാരായ ഡോ സദനം കൃഷ്ണൻകുട്ടി, കലാനിലയം രാഘവൻ, കലാനിലയം ഗോപാലകൃഷ്ണൻ, കലാനിലയം പരമേശ്വരൻ എന്നിവരെ ഗോപിയാശാൻ ദക്ഷിണ നൽകി ആദരിക്കും. തുടർന്ന് ഗോപിയാശാന് ശിഷ്യർ ചേർന്ന് വീരശ്യംഖല സമർപ്പിക്കും. നടനകൈരളി ഡയറക്ടർ വേണുജി മംഗളപത്രസമർപ്പണം നടത്തും. കലാമണ്ഡലം നാരായണൻനായർ, അഡ്വ എ യു രഘുരാമപണിക്കർ തുടങ്ങിയവർ ചടങ്ങിൽ പങ്കെടുക്കുമെന്നും സംഘാടകർ അറിയിച്ചു.
