ആവേശമുയർത്തി എൽഡിഎഫ് സ്ഥാനാർഥി വി എസ് സുനിൽകുമാറിൻ്റെ റോഡ് ഷോ..
ഇരിങ്ങാലക്കുട : നഗരഹൃദയം കവർന്ന് എൽഡിഎഫ് സ്ഥാനാർഥി വി എസ് സുനിൽകുമാറിൻ്റെ റോഡ് ഷോ . ഉൽസവാന്തരീക്ഷത്തിൽ പൂതംക്കുളം മൈതാനിയിൽ നിന്ന് വൈകീട്ട് റവന്യൂ മന്ത്രി കെ രാജൻ , ഉന്നത വിദ്യാഭ്യാസ വകുപ്പ് മന്ത്രി ഡോ ആർ ബിന്ദു എന്നിവരോടൊപ്പം ജീപ്പിൽ നീങ്ങിയ സ്ഥാനാർഥിയെ സ്ത്രീകൾ അടക്കം ഒട്ടേറെ പേർ അനുഗമിച്ചു. പ്രധാന വീഥിയിലുടെ നീങ്ങിയ മുൻമന്ത്രി കൂടിയായ വി എസ് സുനിൽകുമാർ റോഡിൻ്റെ ഇരുവശത്തും കാത്ത് നിന്നവരെ കൈ ഉയർത്തി അഭിവാദ്യം ചെയ്തു. കുട്ടംകുളം സമരഭൂമിയിലാണ് റോഡ് ഷോ സമാപിച്ചത്. മുൻ എം എൽ എ പ്രൊഫ കെ യു അരുണൻ, എൽഡിഎഫ് നേതാക്കളായ കെ ശ്രീകുമാർ, ടി കെ സുധീഷ്, കെ എസ് ജയ, പി മണി, ഉല്ലാസ് കളക്കാട്ട്, എൻ കെ ഉദയപ്രകാശ്, വി എ മനോജ്കുമാർ, ടി ജി ശങ്കരനാരായണൻ, ടി കെ വർഗ്ഗീസ്, ഗിരീഷ് മണപ്പെട്ടി എന്നിവർ നേതൃത്വം നൽകി. തുടർന്ന് നടന്ന ചടങ്ങിൽ തിരഞ്ഞെടുപ്പ് കമ്മിറ്റി ഓഫീസിൻ്റെ ഉദ്ഘാടനം ഉന്നത വിദ്യാഭ്യാസ വകുപ്പ് മന്ത്രി ഡോ ആർ ബിന്ദു നിർവഹിച്ചു.
രാവിലെ ബിഷപ്പ് മാർ പോളി കണ്ണൂക്കാടനുമായുള്ള കൂടിക്കാഴ്ചയോടെയാണ് സ്ഥാനാർഥിയുടെ പ്രചരണ പരിപാടികൾ ആരംഭിച്ചത്. കൂടൽമാണിക്യം ക്ഷേത്രം, ജുമാ മസ്ജിദ്, കുട്ടംകുളം സമര സേനാനി കെ വി ഉണ്ണിയുടെയും മുൻ എം പി ഇന്നസെൻ്റിയും പ്രൊഫ മീനാക്ഷി തമ്പാൻ്റെയും വസതികൾ വി എസ് സുനിൽ കുമാർ സന്ദർശിച്ചു.
