മുൻ എംപി യുടെ കുടുംബാംഗങ്ങളെ സന്ദർശിച്ച് എൽഡിഎഫ് സ്ഥാനാർഥിയും മുൻ മന്ത്രിയുമായ പ്രൊഫ. സി രവീന്ദ്രനാഥ്; വർത്തമാനകാല രാഷ്ട്രീയ സാഹചര്യം അനുകൂലമെന്നും ചാലക്കുടിയിൽ മികച്ച വിജയം നേടുമെന്നും പ്രൊഫ സി രവീന്ദ്രനാഥ്…
ഇരിങ്ങാലക്കുട : ചാലക്കുടിയുടെ മുൻ എം പി യും നടനുമായിരുന്ന ഇന്നസെൻ്റിൻ്റെ കുടുംബാംഗങ്ങളെ സന്ദർശിച്ച് ചാലക്കുടി ലോക്സഭാ മണ്ഡലം ഇടതുപക്ഷസ്ഥാനാർഥിയും മുൻ മന്ത്രിയുമായ പ്രൊഫ സി രവീന്ദ്രനാഥ്. രാവിലെ എട്ട് മണിയോടെ ഇരിങ്ങാലക്കുടയിലെ വസതിയിൽ എത്തിയ സ്ഥാനാർഥിയെ ഇന്നസെൻ്റിൻ്റെ മകൻ സോണറ്റിൻ്റെ നേത്യത്വത്തിൽ സ്വീകരിച്ചു. കുടുംബ വിശേഷങ്ങളും ഇന്നസെൻ്റിൻ്റെ പേരക്കുട്ടികളുടെ വിദ്യാഭ്യാസ വിവരങ്ങളും ചോദിച്ചറിഞ്ഞാണ് സ്ഥാനാർഥി വീട്ടിൽ നിന്ന് ഇറങ്ങിയത്. ചാലക്കുടിയിൽ ഇത്തവണ എൽഡിഎഫ് മികച്ച ഭൂരിപക്ഷത്തോടെ വിജയിക്കുമെന്നും വർത്തമാനകാല രാഷ്ട്രീയ സാഹചര്യം അനുകൂലമാണെന്നും പ്രൊഫ സി രവീന്ദ്രനാഥ് മാധ്യമ പ്രവർത്തകരോട് പറഞ്ഞു. ലോനപ്പൻ നമ്പാടൻ, ഇന്നസെൻ്റ് എന്നിവരുടെ വിജയങ്ങൾ മണ്ഡലത്തിൻ്റെ ഇടതുപക്ഷ മനസ്സിൻ്റെ സൂചനയാണ്. കാലടി സർവകലാശാല അടക്കമുള്ള വിദ്യാഭ്യാസ സ്ഥാപനങ്ങൾ ഉള്ള മണ്ഡലത്തിൽ നവകേരള സൃഷടി എന്ന ആശയം മുൻനിറുത്തിയുള്ള വൈജ്ഞാനിക സമൂഹത്തിൻ്റെ സാധ്യതകൾ എറെയാണ്. ഓരോ മണ്ഡലത്തിന് വേണ്ടിയും മാസ്റ്റർ പ്ലാൻ തയ്യറാക്കുമെന്നും താഴെത്തട്ടിലുള്ള വികസന പ്രവർത്തനങ്ങൾ എകോപിപ്പിക്കാനും നടപടികൾ സ്വീകരിക്കുമെന്നും അദ്ദേഹം പറഞ്ഞു.
