62 മത് കണ്ടംകുളത്തി ഫുട്ബോൾ ടൂർണമെൻ്റ്; കേരളവർമ്മ കോളേജും പഴഞ്ഞി എം ഡി കോളേജും ഫൈനലിൽ..
ഇരിങ്ങാലക്കുട :ക്രൈസ്റ്റ് കോളേജ് മൈതാനിയിൽ നടക്കുന്ന 62 – മത് കണ്ടംകുളത്തി ലോനപ്പൻ മെമ്മോറിയൽ വിന്നേഴ്സ് & ടി എൽ തോമസ് റണ്ണേഴ്സ് ട്രോഫികൾക്ക് വേണ്ടിയുള്ള സൗത്ത് ഇന്ത്യൻ ഫുട്ബോൾ ടൂർണമെന്റിൻ്റെ ഫൈനലിൽ കേരളവർമ കോളേജും, എം ഡി കോളേജ് പഴഞ്ഞിയും എറ്റുമുട്ടും. ആദ്യ സെമിഫൈനൽ മത്സരത്തിൽ കേരളവർമ കോളേജ് രണ്ടിനെതിരെ മൂന്ന് ഗോളുകൾക്ക് സെന്റ് തോമസ് കോളേജ് തൃശ്ശൂരിനെയും രണ്ടാമത്തെ സെമിഫൈനൽ മത്സരത്തിൽ എം ഡി കോളേജ് പഴഞ്ഞി ഒന്നിനെതിരെ രണ്ടു ഗോളുകൾക്ക് ശ്രീ വ്യാസ എൻ എസ് എസ് കോളേജിനെയും പരാജയപ്പെടുത്തി. നാളെ വൈകീട്ട് മൂന്ന് മണിക്കാണ് ഫൈനൽ മൽസരം. സമാപന ചടങ്ങിൽ മുൻകാല ക്രൈസ്റ്റ് കോളേജ് ഫുട്ബോൾ താരവും, ഇന്ത്യൻ ഫുട്ബോൾ താരവും, നിലവിൽ കേരള സ്റ്റേറ്റ് സ്പോർട്സ് കൗൺസിൽ പ്രസിഡന്റുമായ യു ഷറഫലി വിജയികൾക്കുള്ള സമ്മാനദാനം നിർവഹിക്കും.
