മാഹിയിൽ നിന്നുള്ള 72 ലിറ്റര്‍ ഇന്ത്യൻ നിർമ്മിത വിദേശ മദ്യവുമായി കോഴിക്കോട് സ്വദേശികളായ രണ്ട് പേർ ഇരിങ്ങാലക്കുട എക്സൈസ് സംഘത്തിൻ്റെ പിടിയിൽ ….
ഇരിങ്ങാലക്കുട: മാഹിയിൽ നിന്നും നിയമവിരുദ്ധമായി കടത്തുകയായിരുന്ന 72 ലിറ്റര്‍ ഇന്ത്യൻ നിർമ്മിത വിദേശ മദ്യവുമായി രണ്ടുപേര്‍ ഇരിങ്ങാലക്കുട എക്സൈസ് സംഘത്തിൻ്റെ പിടിയില്‍. കോഴിക്കോട് സ്വദേശികളായ മലാപറമ്പ് പാറപ്പുറത്ത് ഡാനിയേൽ (40), കുറ്റിച്ചിറ വലിയകത്ത് സാഹിന (42) എന്നിവരാണ് പിടിയിലായത്. മദ്യം കടത്താന്‍ ഉപയോഗിച്ച കാറും കസ്റ്റഡിയിലെടുത്തു. രാവിലെ പത്ത് മണിയോടെ കൊടകര -ആളൂർ റോഡിൽ വച്ചാണ് ഇരിങ്ങാലക്കുട എക്സൈസ് റെയ്ഞ്ച് ഇന്‍സ്‌പെക്ടര്‍ എ.ബി. പ്രസാദിന്റെ നേതൃത്വത്തിലുള്ള സംഘം പിടികൂടിയത്. തൃശ്ശൂര്‍ എക്സൈസ് കമ്മീഷണര്‍ക്കു ലഭിച്ച രഹസ്യവിവരത്തെ തുടര്‍ന്ന് ദേശീയ പാതയില്‍ പരിശോധന നടത്തുന്നതിനിടെയിലാണ്
ഇവരെ പിടികൂടിയത്. ബോംബെ ഡീലക്സ്, ബ്ലാക്ക് ഡിസ്പി, മാൻഷൻ ഹൗസ് എന്നീ ബ്രാൻ്റുകളിലുള്ള ബ്രാണ്ടിയാണ് കാറിൽ നിന്നും പിടിച്ചെടുത്തത്. ഉദ്യോഗസ്ഥരായ ടി ജി മോഹനൻ, എ സന്തോഷ്, കൃഷ്ണപ്രസാദ്, കെ എം സജീവൻ, പി എം ബാബു, പി കെ സുനിൽ, ടി ആർ സുനിൽ, കെ കെ വൽസൻ, ജിവേഷ്, സനീഷ്, നിത, ശാലിനി എന്നിവരും അന്വേഷണ സംഘത്തിൽ ഉണ്ടായിരുന്നു.
