ഗവ. മോഡൽ ബോയ്സ് ഹയർ സെക്കൻഡറി സ്കൂളിൻ്റെ 150-ാം വാർഷിക ആഘോഷങ്ങൾ അന്തിമഘട്ടത്തിലേക്ക്; സമാപന സമ്മേളനം ജനുവരി 27 ന് മന്ത്രി ഡോ ആർ ബിന്ദു ഉദ്ഘാടനം ചെയ്യും…
ഇരിങ്ങാലക്കുട : ഇരിങ്ങാലക്കുട ഗവൺമെൻ്റ് മോഡൽ ബോയ്സ് ഹയർ സെക്കന്ററി സ്കൂളിൻ്റെ ഒരു വർഷം നീണ്ടു നിന്ന 150-ാം വാർഷിക ആഘോഷങ്ങൾ അന്തിമഘട്ടത്തിലേക്ക് . ജനുവരി 27 വൈകീട്ട് 4.30 ന് നടക്കുന്ന സമാപന സമ്മേളനം ഉന്നത വിദ്യാഭ്യാസ വകുപ്പ് മന്ത്രി ഡോ ആർ ബിന്ദു ഉദ്ഘാടനം ചെയ്യുമെന്ന് നഗരസഭ ചെയർപേഴ്സൺ സുജ സഞ്ജീവ്കുമാർ, പ്രിൻസിപ്പാളും ജനറൽ കൺവീനറുമായ മുരളി എം കെ എന്നിവർ പത്ര സമ്മേളനത്തിൽ അറിയിച്ചു. ടി എൻ പ്രതാപൻ എം പി , പൂർവ വിദ്യാർഥിയും ചലച്ചിത്ര താരവുമായ ഡെയിൻ ഡേവീസ് എന്നിവർ മുഖ്യാതിഥികളായി പങ്കെടുക്കും.. രാവിലെ 10 ന് നടക്കുന്ന ഗുരുവന്ദനം, പൂർവ്വ വിദ്യാർഥി സംഗമം എന്നീ പരിപാടികൾ സംഗീത സംവിധായകൻ വിദ്യാധരൻ മാസ്റ്റർ ഉദ്ഘാടനം ചെയ്യും. വൈകീട്ട് 6 ന് ചാനൽ ഗായകരും കോമഡി ഉത്സവ താരങ്ങളും നയിക്കുന്ന ദൃശ്യകലാ വിസ്മയം ഒരുക്കിയിട്ടുണ്ട്. പ്രധാന അധ്യാപകരായ രാജലക്ഷ്മി ആർ, ടി കെ ലത , പിടിഎ പ്രസിഡന്റ് വി ആർ ബിനോയ് , ഒഎസ്എ പ്രസിഡണ്ട് ജോസ് തെക്കേത്തല എന്നിവരും പത്ര സമ്മേളനത്തിൽ പങ്കെടുത്തു.
