ഗാന്ധിജിയുടെ ഇരിങ്ങാലക്കുട സന്ദർശനത്തിന്റെ ഓർമ്മകൾ വീണ്ടെടുത്ത് 95 പിന്നിടുന്ന റോസി പോൾ ; ഗാന്ധി മാർഗ്ഗത്തിന്റെ പ്രസക്തി ഉറപ്പിക്കുന്ന റോസി പോളിനെ ആദരിച്ച് നീഡ്സ് പ്രവർത്തകരും …..
ഇരിങ്ങാലക്കുട : ” ഇളയച്ഛന്റെ കൈ പിടിച്ച് ചെന്ന് മഹാത്മാവിനെ മാലയിടുമ്പോൾ ഉള്ള പുഞ്ചിരി തൂകുന്ന മുഖമാണ് ഇപ്പോഴും മനസ്സിൽ . .മഹാത്മജിയുടെ ആദർശവും സത്യസന്ധതയും വിനയവുമൊക്കെയാണ് നമ്മൾ കണ്ട് പഠിക്കേണ്ടത് ” – പറയുന്നത് 95 ന്റെ നിറവിലും ആരോഗ്യവതിയായി തുടരുന്ന ഇരിങ്ങാലക്കുട ഉദയ പ്രൊവിൻസ് റോഡിൽ കോനിക്കര തോമസ് മാസ്റ്ററുടെ മകൾ റോസി. ഹരിജനോദ്ധാരണ ഫണ്ട് ശേഖരണവുമായി ബന്ധപ്പെട്ടാണ് 1924 ജനുവരി 17 നാണ് ഗാന്ധിജി ഇരിങ്ങാലക്കുടയിൽ എത്തിയത്. പിതാവിന്റെ സഹോദരനും സ്വാതന്ത്ര്യസമര പോരാളിയുമായിരുന്ന കൊച്ചാപ്പു മാസ്റ്ററാണ് ചടങ്ങിലേക്ക് അഞ്ച് വയസ്സ് മാത്രം ഉണ്ടായിരുന്ന റോസിയെ പുതുവസ്ത്രങ്ങൾ ധരിപ്പിച്ച് ചളിയംപാടത്തെ വേദിയിൽ എത്തിച്ചത്. 90 വർഷം പിന്നിടുന്ന ഓർമ്മ റോസി പോൾ വീണ്ടെടുക്കുന്നത് തികഞ്ഞ ആർജ്ജവത്തോടെ . ” സമാധാനത്തിൽ ജീവിക്കണമെങ്കിൽ ഗാന്ധിമാർഗ്ഗം പിന്തുടരണം. ആരെയും നിന്ദിക്കേണ്ട കാര്യമില്ല. പരസ്പര ധാരണ വേണം. ” . ഇരിങ്ങാലക്കുട കേന്ദ്രീകരിച്ച് പ്രവർത്തിക്കുന്ന സാമൂഹ്യ-സാംസ്കാരിക സംഘടനയായ നീഡ്സിന്റെ ആഭിമുഖ്യത്തിൽ ഗാന്ധിജിയുടെ ഇരിങ്ങാലക്കുട സന്ദർശനത്തിന്റെ നവതി ആഘോഷങ്ങളുടെ ഭാഗമായിട്ടാണ് റോസി പോളിനെ വസതിയിൽ എത്തി ആദരിച്ചത്. 1924 ജനുവരി 17 നാണ് ഗാന്ധിജി ഇരിങ്ങാലക്കുടയിൽ എത്തിയത്. മുൻ മന്ത്രിയും കേരള കോൺഗ്രസ്സ് നേതാവുമായ പി ജെ ജോസഫിന്റെ ബന്ധു കൂടിയാണ് റോസി പോൾ. പരേതനായ വരാപ്പുഴ പുത്തൻ പള്ളി തേനേങ്കടത്ത് വീട്ടിൽ പോൾ ആണ് ഭർത്താവ്. ഇരിങ്ങാലക്കുട സെന്റ് തോമസ് കത്തീഡ്രൽ ദനഹാതിരുന്നാൾ പ്രമാണിച്ച് രണ്ടാഴ്ച മുമ്പാണ് റോസി പോൾ ഇരിങ്ങാലക്കുടയിലെ വസതിയിൽ എത്തിയത്. ദീർഘകാലം ബാങ്കിംഗ് രംഗത്ത് പ്രവർത്തിച്ചിട്ടാണ് വിരമിച്ചത്. അഞ്ച് മക്കളുണ്ട്. നീഡ്സ് ചെയർമാനും മുൻ സർക്കാർ ചീഫ് വിപ്പുമായ അഡ്വ തോമസ് ഉണ്ണിയാടൻ റോസി പോളിനെ പൊന്നാട അണിയിച്ച് ആദരിച്ചു. നീഡ്സിന്റെ ഭാരവാഹികളായ കെ പി ദേവദാസ് , എൻ എ ഗുലാംമാസ്റ്റർ, നഗരസഭ കൗൺസിലർ പി ടി ജോർജ്ജ്, പി കെ ജോൺസൻ , ഇ പി സഹദേവൻ, റിനാസ് താണിക്കപ്പറമ്പിൽ , ഷൗക്കത്തലി, ജോൺ ഗ്രേഷ്യസ് , റോസി പോളിന്റെ ബന്ധു സുഭാഷ് കോനിക്കര തുടങ്ങിയർ പങ്കെടുത്തു.
