കരൂപ്പടന്നയിൽ പെട്രോൾ ഒഴിച്ച് വീടിന് തീ വച്ച് വീട്ടുകാരെ വധിക്കാൻ ശ്രമിച്ച പ്രതി അറസ്റ്റിൽ ….
ഇരിങ്ങാലക്കുട : കരൂപ്പടന്നയിൽ പെട്രോൾ ഒഴിച്ച് വീടിന് തീ വച്ച് വീട്ടുകാരെ വധിക്കാൻ ശ്രമിച്ച പ്രതി അറസ്റ്റിൽ . മുസാഫരിക്കുന്ന് മുടവൻകാട്ടിൽ വീട്ടിൽ ബുറാക്ക് എന്ന് വിളിക്കുന്ന ഷെഫീക്ക് (42) നെയാണ് സിഐ അനീഷ് കരീം, എസ് ഐ എം എസ് ഷാജൻ എന്നിവരുടെ നേതൃത്വത്തിൽ ഉള്ള പോലീസ് സംഘം കൊരട്ടിയിൽ നിന്ന് അറസ്റ്റ് ചെയ്തത്. ഒക്ടോബർ 31 ന് രാത്രി ആയിരുന്നു സംഭവം. മുസാഫരിക്കുന്നിലുള്ള പോക്കാക്കില്ലത്ത് ജാഫർ കുടുംബമായി താമസിക്കുന്ന വീടാണ് പ്രതി തീ വച്ച് നശിപ്പിച്ചത്. മൂന്ന് വർഷം മുമ്പുണ്ടായ ജാഫറുമായി ഉണ്ടായ തർക്കത്തിന്റെ വൈരാഗ്യത്തിലാണ് കൃത്യം നടത്തിയതെന്ന് പ്രതി പോലീസിനോട് വെളിപ്പെടുത്തി. ഇതേ സമയം ജാഫറും കുടുംബവും ഒരു ചടങ്ങുമായി ബന്ധപ്പെട്ട് ബന്ധുവീട്ടിൽ ആയതിനാൽ അപകടത്തിൽ നിന്ന് രക്ഷപ്പെടുകയായിരുന്നു. വീടും വീട്ടുപകരണങ്ങളും രേഖകളും കത്തി നശിച്ചതിനെ തുടർന്ന് മൂന്ന് ലക്ഷം രൂപയുടെ നഷ്ടമാണ് സംഭവിച്ചിട്ടുള്ളത്. എസ്ഐ മാരായ ക്ലീറ്റസ്, എൻ കെ അനിൽകുമാർ , കെ ആർ സുധാകരൻ, ഉദ്യോഗസ്ഥരായ ഉല്ലാസ് പൂതോട്ട് , വഹദ് ആനാപ്പുഴ , മുരളീകൃഷ്ണ, വിപിൻ , ഫഹദ്, ഫ്രെഡ്ഡി എന്നിവരും അന്വേഷണസംഘത്തിൽ ഉണ്ടായിരുന്നു. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.
