ബൈക്കിൽ നിന്ന് തെറിച്ച് വീണ് റോഡിൽ കിടക്കുന്നതായി കണ്ടെത്തിയ ഇരിങ്ങാലക്കുട സ്വദേശിയും എസ്എൻവൈഎസ് ട്രഷററുമായ യുവാവ് ചികിൽസക്കിടയിൽ ഹൃദയസ്തംഭനത്തെ തുടർന്ന് മരിച്ചു …
ഇരിങ്ങാലക്കുട : ബൈക്കിൽ നിന്ന് റോഡിൽ വീണ് കിടക്കുന്നതായി കണ്ടെത്തിയ യുവാവ് ചികിൽസക്കിടയിൽ ഹൃദയ സ്തംഭനത്തെ തുടർന്ന് മരിച്ചു. ഇരിങ്ങാലക്കുട മടത്തിക്കര ലൈനിൽ മുക്കുളം മോഹനന്റെ മകൻ ബിജോയ് (43 ) ആണ് മരിച്ചത്. മാർക്കറ്റ് – വൺവേ റോഡിൽ ഇരട്ടക്കപ്പേളക്ക് സമീപമുള്ള വളവിന് അടുത്ത് വീണ് കിടക്കുന്നതായി വിവരം ലഭിച്ചതിനെ തുടർന്ന് സഹകരണ ആശുപത്രി അധികൃതർ ആംബുലൻസിൽ വന്ന് കൊണ്ട് പോവുകയായിരുന്നു. രാത്രി പത്തരയോടെയാണ് സംഭവം. സ്കാനിംഗിൽ പ്രശ്നങ്ങൾ ഉണ്ടായിരുന്നില്ലെന്നും പിന്നീട് ഉണ്ടായ ഹൃദയസ്തംഭനമാണ് മരണ കാരണമെന്നും ആശുപത്രി അധികൃതർ അറിയിച്ചു. തിങ്കളാഴ്ച പുലർച്ചെ ഒന്നേമുക്കാലോടെയാണ് മരണം സംഭവിച്ചത്. ലോറി ഉടമയായ ബിജോയ് രാത്രി കെഎസ്ഇ കമ്പനി പരിസരത്ത് നിന്ന് വീട്ടിലേക്ക് മടങ്ങുകയായിരുന്നു. റോഡിലെ വലിയ കുഴിയിൽ വീണ് വണ്ടിയുടെ നിയന്ത്രണം നഷ്ടപ്പെട്ടതാകാമെന്ന് സംശയമുണ്ട്. ഇരിങ്ങാലക്കുട എസ്എൻബിഎസ് സമാജം കമ്മിറ്റി അംഗവും എസ്എൻവൈഎസ് ട്രഷററുമായിരുന്നു. ജിഗ്നേഷ് ,വൈഷ്ണവ് എന്നിവർ മക്കളാണ്. സംസ്കാരം ഇന്ന് വൈകീട്ട് 4.30 ന് മുക്തിസ്ഥാനിൽ .
