രാജ്യത്തിന്റെ ആത്മാവിനേറ്റ ക്ഷതമാണ് മണിപ്പൂർ കലാപമെന്നും തനിക്ക് അതീവ ദുഖമുണ്ടെന്നും
ഗവർണർ ശ്രീധരൻ പിള്ള …
ഇരിങ്ങാലക്കുട: മണിപ്പൂർ കലാപം രാജ്യത്തിന്റെ ആത്മാവിനേറ്റ ക്ഷതമാണെന്നും തനിക്ക് അതീവ ദുഖമുണ്ടെന്നും ഗോവ ഗവർണർ ശ്രീധരൻ പിള്ള. ഇരിങ്ങാലക്കുട ഡോൺ ബോസ്കോ ഡയമണ്ട് ജൂബിലി ആഘോഷങ്ങളുടെ ഭാഗമായി നടന്ന മെഗാ എക്സിബിഷൻ ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. വേദനാജനകമായ സംഭവങ്ങളാണ് അവിടെ നടക്കുന്നത്. പ്രധാനമന്ത്രിക്കും ഇക്കാര്യത്തിൽ വലിയ മനോവിഷമമുണ്ടെന്നും പ്രശ്നം എത്രയും വേഗം രമ്യമായി പരിഹരിക്കാനാകുമെന്ന പ്രതീക്ഷയിലാണെന്നും അദ്ദേഹം പറഞ്ഞു.രൂപത വികാരി ജനറാൾ മോൺ. ജോസ് മഞ്ഞളി അദ്ധ്യക്ഷത വഹിച്ചു. വിവിധ കർമ്മ മണ്ഡലങ്ങളിൽ പ്രതിഭ തെളിയിച്ച പി.പി. ജെയിംസ്, പി.എസ്. പ്രശാന്ത്, സെബി മാളിയേക്കൽ എന്നിവരെ ഗവർണർ ആദരിച്ചു. ഡോൺ ബോസ്കോയുടെ സ്നേഹോപഹാരം റെക്ടർ ഫാ. ഇമ്മാനുവേൽ വട്ടക്കുന്നേൽ ഗവർണർക്ക് സമ്മാനിച്ചു. ജൂബിലി ജനറൽ കൺവീനർ പോൾ ജോസ് തളിയത്ത്, പി.പി. ജെയിംസ് പുന്നേലി പറബിൽ എന്നിവർ ആശംസകൾ നേർന്നു. റെക്ടറും മാനേജറുമായ ഫാ. ഇമ്മാനുവേൽ വട്ടക്കുന്നേൽ, സ്വാഗതവും, ഹയർ സെക്കണ്ടറി പ്രിൻസിപ്പൽ ഫാ. സന്തോഷ് മാത്യു നന്ദിയും പറഞ്ഞു.
