ഓട്ടോ പേട്ടയില്‍ ഡ്രൈവര്‍മാര്‍ തമ്മില്‍ സംഘര്‍ഷം; മൂന്നു പേര്‍ക്കെതിരെ പോലീസ് കേസെടുത്തു..
ഇരിങ്ങാലക്കുട: ബസ് സ്റ്റാന്‍ഡിന് അടുത്തുള്ള മെയിന്‍ ഓട്ടോറിക്ഷാ പേട്ടയില്‍ ഡ്രൈവര്‍മാര്‍ തമ്മിലുണ്ടായ സംഘര്‍ഷത്തില്‍ മൂന്നു പേര്‍ക്കെതിരെ പോലീസ് കേസെടുത്തു. ചെമ്മണ്ട ചേരംപറമ്പില്‍ വീട്ടില്‍ കൃഷ്ണകുമാര്‍(40), എടക്കുളം പാറപ്പുറത്ത് വീട്ടില്‍ അഭിഷേക്(34), ചേര്‍പ്പ് കളത്തൂര്‍ വീട്ടില്‍ രഞ്ജിത്ത്(32) എന്നിവര്‍ക്കെതിരെയാണ് പോലീസ് കേസെടുത്തിരിക്കുന്നത്. പേട്ടയില്‍ ഓട്ടോറിക്ഷ പാര്‍ക്ക് ചെയ്യുന്നതുമായി ബന്ധപ്പെട്ട് ഡ്രൈവര്‍മാര്‍ തമ്മില്‍ ആരംഭിച്ച തര്‍ക്കം സംഘര്‍ഷത്തിലേക്ക് മാറുകയായിരുന്നു. മദ്യപിച്ച് എത്തിയ ഡ്രൈവര്‍മാര്‍ കമ്പിവടികള്‍ ഉപയോഗിച്ച് ബസ് സ്റ്റാന്‍ഡ് പരിസരത്ത് ഏറെ നേരം ഭീകരാന്തരീക്ഷം സൃഷ്ടിച്ചിരുന്നു. ആഗസ്റ്റ് 15 നാണ് കേസിനാസ്പദമായ സംഭവം നടന്നത്. ഇരിങ്ങാലക്കുട ഇന്‍സ്‌പെക്ടര്‍ അനീഷ് കരീമിന്റെ നേതൃത്വത്തില്‍ മൂന്ന് ജീപ്പ് പോലീസ് എത്തിയാണ് സംഘര്‍ഷം നിയന്ത്രണ വിധേയമാക്കിയത്. സംഘര്‍ഷത്തിന് കാരണമായവര്‍ പോലീസ് എത്തും മുന്‍പേ ഓട്ടോറിക്ഷയില്‍ രക്ഷപ്പെട്ടിരുന്നു. സംഭവത്തില്‍ ആരും പരാതി നല്‍കിയിട്ടില്ലെങ്കിലും പോലീസ് സ്വമേധയാ എടുത്ത കേസാണിത്.
