ശ്രീകൂടൽമാണിക്യ തിരുവുൽസവം ; നൂറോളം സ്റ്റാളുകളുമായി എക്സിബിഷന് തുടക്കമായി….
ഇരിങ്ങാലക്കുട : ശ്രീ കൂടൽമാണിക്യ തിരുവുൽസവത്തിന്റെ ഭാഗമായുള്ള എക്സിബിഷന് തുടക്കമായി. കൊട്ടിലാക്കൽ മൈതാനിയിൽ ആരംഭിച്ച എക്സിബിഷന്റെ ഉദ്ഘാടനം ഉന്നത വിദ്യാഭ്യാസ വകുപ്പ് മന്ത്രി ഡോ ആർ ബിന്ദു നിർവ്വഹിച്ചു. കാർഷിക സർവകലാശാല, പോലീസ്, എക്സൈസ്, വിദ്യാഭ്യാസം, ടൂറിസം എന്നീ സർക്കാർ വകുപ്പുകൾ, വിനോദത്തിന് പ്രാധാന്യം നൽകിയുള്ള മരണക്കിണർ , ജയന്റ് വീൽ, ഫ്ളോട്ടിംഗ് വഞ്ചി, വിവിധ ഗെയിമുകൾ, കളിക്കോപ്പുകൾ , അലങ്കാര വസ്തുക്കൾ, ഐസ് ക്രീം എന്നിവയുടെ അടക്കം നൂറോളം സ്റ്റാളുകളാണ് ഇത്തവണ എക്സിബിഷന് എത്തിയിട്ടുള്ളത്. മണ്ണുത്തി സ്വദേശിയായ വിനീഷ് ഗോവിന്ദനാണ് എക്സിബിഷന്റെ കരാർ ലേലത്തിലൂടെ എറ്റെടുത്തിട്ടുള്ളത്. ചടങ്ങിൽ നഗരസഭ ചെയർപേഴ്സൺ സോണിയ ഗിരി,ദേവസ്വം ചെയർമാൻ പ്രദീപ് മേനോൻ , ഭരണ സമിതി അംഗങ്ങൾ, ഉൽസവ സംഘാടക സമിതി ഭാരവാഹികൾ, ഭക്തജനങ്ങൾ തുടങ്ങിയവർ പങ്കെടുത്തു.
