ഇരിങ്ങാലക്കുട സെന്റ് തോമസ് ദനഹ തിരുനാളിന്റെ ഭാഗമായുളള അമ്പ് എഴുന്നള്ളിപ്പിനിടെ മേളക്കാർക്ക് കുത്തേറ്റു
ഇരിങ്ങാലക്കുട : സെന്റ് തോമസ് കത്തീഡ്രൽ ദനഹ തിരുനാളിന്റെ ഭാഗമായുള്ള അമ്പ് എഴുന്നള്ളിപ്പിനിടെ മേളക്കാർക്ക് കുത്തേറ്റു. കുത്തേറ്റ ചൊവ്വലൂർപ്പടി പീച്ചിലി വീട്ടിൽ സോനു ( 21 ) , പാവറട്ടി പാലുവായ് കൊഴപ്പാട്ട് വീട്ടിൽ വിഷ്ണു ( 28 ) എന്നിവരെ താലൂക്ക് ആശുപത്രിയിൽ പ്രവേശിപ്പിച്ചു. ഇന്നലെ രാത്രി എട്ടരയോടെ കാട്ടുങ്ങച്ചിറ പള്ളിക്കാട് സാന്ത്വനം അമ്പ് എഴുന്നള്ളിപ്പിനിടെയായിരുന്നു സംഭവം. തന്റെ വീട്ടിൽ മേളം അധികം കൊട്ടിയില്ലെന്ന വൈരാഗ്യത്തിൽ പള്ളിക്കാട് മുണ്ടോക്കാരൻ വീട്ടിൽ മൈക്കിൾ ( 49 ) ഇരുവരെയും വീട്ടിൽ നിന്ന് മാറി റോഡിൽ ചെന്ന് കുത്തുകയായിരുന്നുവെന്ന് പോലീസ് പറഞ്ഞു. സോനുവിന്റെ വയറ്റിലും പിടിച്ച് മാറ്റാൻ ചെന്ന വിഷ്ണുവിന്റെ കൈത്തണ്ടയിലുമാണ് കുത്തേറ്റത്. ഇരുവരും കുന്നംകുളം അക്കിക്കാവ് ശിങ്കാരിമേളം ടീമിലെ അംഗങ്ങളാണ്. കുത്തിയ മുണ്ടോക്കാരൻ വീട്ടിൽ മൈക്കിളിനെ എസ് ഐ ഷാജന്റെ നേത്യത്വത്തിലുള്ള സംഘം കസ്റ്റഡിയിൽ എടുത്തിട്ടുണ്ട്.
