ക്രിസ്മസ് ദിനത്തിൽ അവിട്ടത്തൂരിൽ മധ്യവയസ്കരെ അക്രമിച്ച കേസിൽ ഒളിവിലായിരുന്ന പ്രധാന പ്രതി അറസ്റ്റിൽ …
ഇരിങ്ങാലക്കുട :അവിട്ടത്തൂരിൽ മദ്യത്തിന്റെയും കഞ്ചാവിന്റേയും ലഹരിയിൽ മധ്യവയസ്കരെ ആക്രമിച്ച കൗമാരക്കാരടക്കമുള്ള പ്രതികളിൽ ഒളിവിലായിരുന്ന അവിട്ടത്തൂർ സ്വദേശി അമ്പാടത്ത് വീട്ടിൽ സായ് കൃഷ്ണയെ ( 31 വയസ്സ്) റൂറൽ എസ്.പി. ഐശ്വര്യ ഡോങ്ങ്ഗ്രേയുടെ നിർദ്ദേശപ്രകാരം ഇരിങ്ങാലക്കുട ഡി.വൈ.എസ്.പി. ബാബു കെ.തോമസ്, ആളൂർ ഇൻസ്പെക്ടർ എം.ബി. സിബിൻ എന്നിവരുടെ സംഘം അറസ്റ്റു ചെയ്തു.കഴിഞ്ഞ ദിവസം പുലർച്ചെ മൂന്നു മണിയോടെയാണ് സായ്കൃഷ്ണയെ പോലീസ് സംഘം പിടികൂടിയത്.ഇക്കഴിഞ്ഞ ക്രിസ്മസ് ദിനത്തിൽ വൈകിട്ട് ഏഴരയോടെയായിരുന്നു കേസ്സിനാസ്പദമായ സംഭവം. അവിട്ടത്തൂർ സ്വദേശികളായ ബാബു, സിജേഷ് എന്നിവർക്കാണ് പരുക്കേറ്റത്. ബന്ധുവിന്റെ വീട്ടു മതിലിൽ കയറിയിരുന്ന് മദ്യത്തിനും മയക്കുമരുന്നിനും ലഹരിയിലായിരുന്ന പ്രതികൾ ബഹളമുണ്ടാക്കുന്നത് ഇവർ വിലക്കിയിരുന്നു. ആ സമയം അവിടെ നിന്നു പോയ പ്രതികൾ അല്‌പസമയത്തിനുള്ളിൽ സംഘടിച്ചെത്തി റോഡരികിൽ നിൽക്കുകയായിരുന്ന ബാബുവിനേയും, സിജേഷിനേയും ബിയർ കുപ്പി കൊണ്ടും മരവടി കൊണ്ടും തലയ്ക്കടിച്ചു വീഴ്ത്തി ആക്രമിക്കുകയായിരുന്നു . ഗുരുതര പരുക്കുകളോടെ ബാബു അങ്കമാലി അപ്പോളോ ആശുപത്രിയിൽ അത്യാസന്ന നിലയിൽ ചികിത്സയിലാണ്. സിജേഷിനും സാരമായ പരുക്കുകൾ ഉണ്ട്. പ്രതികളിൽ പ്രായപൂർത്തിയാകാത്തവരും ഉണ്ടായിരുന്നു.
പ്രതികൾക്കെതിരെ പോലീസ് ശക്തമായ നടപടികൾ സ്വീകരിച്ചു വരികയാണ്. പ്രധാന പ്രതികളിൽ 2 പേർ ഒളിവാണ്. അറിസ്റ്റിലായ സായ് കൃഷ്ണയെ കോടതിയിൽ ഹാജരാക്കി റിമാന്റ് ചെയ്തു.
ആളൂർ എസ്.ഐ. കെ.എസ് സുബിന്ത് , എം.എസ്.പ്രദീപ്, ദാസൻ മുണ്ടയ്ക്കൽ, എ.എസ്.ഐ.മാരായ കെ.ടി.ജോഷി, ടി.ആർ.ബാബു (സ്പെഷ്യൽ ബ്രാഞ്ച്)സീനിയർ സി.പി.ഒ മാരായ മനോജ്, ഇ.എസ്.ജീവൻ , സോണി സേവ്യർ , സി.പി.ഒ കെ.എസ്.ഉമേഷ് എന്നിവരടങ്ങിയ സംഘമാണ് പ്രതിയെ പിടികൂടിയത്.
