മഹാത്മാഗാന്ധിയുടെ ഇരിങ്ങാലക്കുട സന്ദർശനത്തിന്റെ നവതി ആഘോഷങ്ങളുമായി നീഡ്സ് …
ഇരിങ്ങാലക്കുട: മഹാത്മാ ഗാന്ധിയുടെ ഇരിങ്ങാലക്കുട സന്ദർശനത്തിന്റെ നവതി ആഘോഷങ്ങളുമായി നീഡ്സ്. ” മഹാത്മാ പാദമുദ്ര @ 90 ” എന്ന പേരിൽ ഒരു വർഷം നീണ്ടു നിൽക്കുന്ന പരിപാടികൾ 2023 ജനുവരി 10 ന് ആരംഭിക്കുമെന്ന് നീഡ്സ് പ്രസിഡണ്ട് അഡ്വ തോമസ് ഉണ്ണിയാടൻ പത്രസമ്മേളനത്തിൽ അറിയിച്ചു. ഗാന്ധിജിയുടെ നേത്യത്വത്തിൽ സമ്മേളനം നടന്ന ചളിയംപാടത്ത് നിന്നും ഗാന്ധിജി വിശ്രമിച്ച റെസ്റ്റ് ഹൗസിലേക്ക് പാദസ്പർശ സ്മൃതി യാത്ര , സിമ്പോസിയങ്ങൾ, സംസ്കാരിക പരിപാടികൾ, ചർച്ചാ ക്ലാസ്സുകൾ , സഹായ പദ്ധതികൾ , വിദ്യാർഥികൾക്കുള്ള മൽസരങ്ങൾ എന്നിവ ഇതോടനുബന്ധിച്ച് നടക്കും. രാഷ്ട്രീയ, സാംസ്കാരിക, സാമൂഹിക , മേഖലകളിലെ നിരവധി വ്യക്തിത്വങ്ങൾ പരിപാടികളിൽ പങ്കെടുക്കും. 2024 ജനുവരി 17 ന് പരിപാടികൾ സമാപിക്കും. നീഡ്സ് വൈസ് – പ്രസിഡണ്ട് പ്രൊഫ. ആർ ജയറാം , സെക്രട്ടറിമാരായ കെ പി ദേവദാസ് , ഗുലാം മുഹമ്മദ് എന്നിവരും പത്രസമ്മേളനത്തിൽ പങ്കെടുത്തു.
