ബസ് കണ്ടക്ടര്‍ക്ക് ക്രൂരമര്‍ദ്ദനം ; വധശ്രമത്തിനു കേസ് ;അഞ്ചു പേര്‍ അറസ്റ്റില്‍…
ഇരിങ്ങാലക്കുട: സാമ്പത്തിക ഇടപാടിനെ ചൊല്ലിയുണ്ടായ തര്‍ക്കത്തില്‍ ബസ് കണ്ടക്ടർക്ക് ഏഴംഗ സംഘത്തിന്റെ ക്രൂരമര്‍ദ്ദനം . സംഭവമായി ബന്ധപ്പെട്ട് അഞ്ച് പേരെ പോലീസ് അറസ്റ്റ് ചെയ്തു. .പുത്തന്‍ചിറ സ്വദേശി പാറേക്കാടന്‍ തോംസനാണ് (26) മര്‍ദ്ദനമേറ്റത്. കേസില്‍ വെള്ളാഞ്ചിറ സ്വദേശി കാഞ്ഞിരത്തിങ്കല്‍ സെലസ്റ്റിന്‍ (30), കുഴിക്കാട്ടുശേരി സ്വദേശി മൂടവീട് സിജോ (35), തുമ്പൂര്‍ സ്വദേശി കൊളങ്ങരപറമ്പില്‍ നവീന്‍ (29), പുത്തന്‍ചിറ സ്വദേശി ചെറാട്ട് ശ്രീജേഷ് (39), താഴേക്കാട് സ്വദേശി പാലക്കല്‍ നിഖില്‍ (34) എന്നിവരെ ഇരിങ്ങാലക്കുട പൊലീസ് അറസ്റ്റ് ചെയ്തു. സംഭവത്തില്‍ രണ്ടു പ്രതികളെ പിടികൂടാനുണ്ട്. കഴിഞ്ഞ ദിവസം രാത്രി പത്തരയോടെ വെള്ളാങ്ങല്ലൂര്‍ പമ്പില്‍ വച്ച് തോംസണുമായി സാമ്പത്തിക വിഷയത്തെ ചൊല്ലി നടന്ന തര്‍ക്കമാണ് തുടക്കം. തുടര്‍ന്ന് പ്രതികള്‍ അഞ്ചു പേരെ കൂടി സംഭവ സ്ഥലത്തേക്ക് വിളിച്ചുവരുത്തുകയും തോംസനെ ക്രൂരമായി മര്‍ദ്ദിക്കുകയുമായിരുന്നു. വിവരമറിഞ്ഞ് പൊലീസ് സ്ഥലത്തെത്തി. അന്വേഷണത്തില്‍ സമീപത്തെ ബാറില്‍ ഉണ്ടായിരുന്ന അഞ്ച് പേരെ പൊലീസ് പിടികൂടി. രണ്ടു പേര്‍ക്കായുള്ള അന്വേഷണം ഊര്‍ജിതമാക്കി. കോടതിയിൽ ഹാജരാക്കിയ പ്രതികളെ റിമാന്‍ഡ് ചെയ്തു.
