കാട്ടൂരിൽ സിപിഎം പ്രവർത്തകനായ യുവാവിനെ കുത്തിപരിക്കേല്‍പിച്ച സംഭവത്തില്‍ രണ്ടു പേര്‍ അറസ്റ്റില്‍…
ഇരിങ്ങാലക്കുട :യുവാവിനെ കുത്തിപരിക്കേല്‍പിച്ച സംഭവത്തില്‍ രണ്ടു പേര്‍ അറസ്റ്റില്‍. കാട്ടൂര്‍ കൊരട്ടിപറമ്പില്‍ വീട്ടില്‍ അന്‍വര്‍ (40) നാണ് കുത്തേറ്റത്. സിപിഎം കാട്ടൂര്‍ ബസാര്‍ ബ്രാഞ്ചംഗമാണ് അന്‍വര്‍. സംഭവത്തില്‍ കാട്ടൂര്‍ വലക്കഴ സ്വദേശി കൊരട്ടിപറമ്പില്‍ വീട്ടില്‍ മുഹമ്മദ് സഹല്‍ (28), പഴുവില്‍ കുറുമ്പിലാവ് സ്വദേശി വെങ്കിടായ് വീട്ടില്‍ അനൂപ് (31) എന്നിവരെയാണ് കാട്ടൂര്‍ പോലീസ് അറസ്റ്റ് ചെയ്തത്. തിങ്കളാഴ്ച രാത്രി ഒമ്പതരയോടെ വീടിനു മുന്നില്‍ വെച്ച് യുവാക്കളുമായി ഉണ്ടായ വാക്കുതര്‍ക്കത്തെ തുടര്‍ന്നാണ് അന്‍വറിന് കുത്തേറ്റത്. മുന്‍വൈരാഗ്യമാണ് സംഭവത്തിന് കാരണമായി പറയപ്പെടുന്നത്. നെഞ്ചില്‍ ആഴത്തില്‍ കുത്തേറ്റ അന്‍വറിനെ കരാഞ്ചിറ മിഷന്‍ ആശുപത്രിയില്‍ പ്രവേശിപ്പിച്ചെങ്കിലും വിദഗ്ധ ചികിത്സക്കായി തൃശൂര്‍ മെഡിക്കല്‍ കോളജില്‍ പ്രവേശിപ്പിക്കുകയായിരുന്നു. കോടതിയിൽ ഹാജരാക്കിയ പ്രതികളെ റിമാന്‍ഡ് ചെയ്തു. കുറ്റക്കാർക്കെതിരെ നടപടി ആവശ്യപ്പെട്ട് സിപിഎം കാട്ടൂർ ലോക്കൽ കമ്മിറ്റിയുടെ നേത്യത്വത്തിൽ വൈകീട്ട് ഹൈസ്കൂൾ ജംഗ്ഷൻ പരിസരത്ത് നിന്ന് കാട്ടൂർ ബസാറിലേക്ക് പ്രകടനം നടത്തിയിരുന്നു.
