തൃശ്ശൂർ റവന്യൂ ജില്ലാ സ്കൂൾ കലോത്സവം ; പൂരക്കളിയിൽ ഇരട്ടവിജയങ്ങളുമായി എടതിരിഞ്ഞി എച്ച്ഡിപി സമാജം ഹയർ സെക്കണ്ടറി സ്കൂൾ …
ഇരിങ്ങാലക്കുട: പൂരക്കളിയിൽ ഇരട്ട വിജയങ്ങളുമായി എടതിരിഞ്ഞി എച്ച്ഡിപി സമാജം ഹയർ സെക്കണ്ടറി സ്കൂൾ. തൃശ്ശൂർ റവന്യൂ ജില്ലാ സ്കൂൾ കലോത്സവത്തിന്റെ ഭാഗമായി ലയൺസ് ക്ലബ് ഹാളിൽ നടന്ന പൂരക്കളി ഹൈസ്കൂൾ, ഹയർ സെക്കൻഡറി വിഭാഗം മൽസരങ്ങളിലാണ് ഉപജില്ലാ കലോൽസവ ജേതാക്കളായ എച്ച്ഡിപി യുടെ നേട്ടം. 2019 ൽ കാഞ്ഞങ്ങാട് വച്ച് നടന്ന സംസ്ഥാന കലോൽസവത്തിൽ ഹയർ സെക്കണ്ടറി വിഭാഗത്തിൽ എച്ച്ഡിപി ഒന്നാം സ്ഥാനം നേടിയിരുന്നു. നാടക പ്രവർത്തകൻ കൂടിയായ സജീഷ് പയ്യന്നൂരിന്റെ നേത്യത്വത്തിലാണ് പരിശീലനം പൂർത്തിയാക്കിയത്. പ്ലസ് വൺ അലോട്ട്മെന്റ് വൈകിയത് കൊണ്ട് പരിശീലനത്തിന് വേണ്ടത്ര സമയം ലഭിച്ചില്ലെന്ന് കഴിഞ്ഞ 21 വർഷങ്ങളായി പൂരക്കളി പരിശീലന രംഗത്തുള്ള സജീഷ് പറയുന്നു. ഇരു ടീമുകളും ഗണപതിപ്പാട്ട് തന്നെയാണ് രംഗത്ത് അവതരിപ്പിച്ചത്.
