മാള മേലഡൂരിൽ യുവാവിനെ വീട്ടിൽ കയറി ആക്രമിച്ച് രക്ഷപ്പെട്ട യുവാക്കൾ അറസ്റ്റിൽ ; പിടി കൂടിയത് പീരുമേട് മലമുകളിലെ ഒളിത്താവളത്തിൽ നിന്ന് …
മാള :മഞ്ഞപ്ര ചുള്ളി സ്വദേശി കൊളാട്ടുകുടി വീട്ടിൽ ടോണി (33 വയസ്സ്), വട്ടപ്പറമ്പ് മഴുവഞ്ചേരി വീട്ടിൽ റിജോ (26 വയസ്സ്), മാള വലിയപറമ്പ് സ്വദേശി പുപ്പൻ എന്ന അരുൺ (27 വയസ്സ്) ,അന്നമനട സ്വദേശി കണ്ണംവേലിത്തറ വീട്ടിൽ സജേഷ് (37 വയസ്സ്) എന്നിവരെയാണ് തൃശൂർ റൂറൽ എസ്.പി. ഐശ്വര്യ ഡോങ്ങ്ഗ്രേയുടെ നേതൃത്വത്തിൽ ഇരിങ്ങാലക്കുട ഡി.വൈ.എസ്.പി. ബാബു കെ. തോമസ്, മാള ഇൻസ്പെക്ടർ സജിൻ ശശി എന്നിവരുടെ സംഘം അറസ്റ്റു ചെയ്തത്. മറ്റൊരു പ്രതി ഇപ്പോഴും ഒളിവിലാണ്. ഇയാളുടെ ബന്ധുവായ പെൺകുട്ടിയെ ഉപദ്രവിക്കാൻ ശ്രമിച്ചത് ചോദിക്കാൻ എത്തിയതാണ് സംഘം . ഇക്കഴിഞ്ഞ പതിനാറാം തിയ്യതി മേലഡൂർ സ്വദേശിയുടെ വീട്ടിലെത്തിയ ഗുണ്ടാ സംഘം ഇയാളെ ആക്രമിക്കുകയായിരുന്നു.വാക്കുതർക്കത്തെ തുടർന്ന് അടിപിടിയിലെത്തിയതോടെ വീട്ടിലേക്ക് ഓടിക്കയറിയ യുവാവിനെ ഗുണ്ടാ സംഘം പിൻതുടർന്ന് വീട്ടിൽ കയറി ആക്രമിച്ചു മൊബൈൽ ഫോൺ തട്ടിയെടുത്തു. ഇതിനിടെ യുവാവിന് മുറിവേൽക്കുകയും ചെയ്തു. സംഭവശേഷം എറണാകുളം, കോയമ്പത്തൂർ, എരുമേലി, പീരുമേട് ഭാഗങ്ങളിൽ ഒളിവിൽ കഴിഞ്ഞു വരികയായിരുന്ന പ്രതികളെ ഇന്ന് പുലർച്ചെ പീരുമേട് മലമുകളിലെ ഒറ്റപ്പെട്ട റിസ്റ്റോർട്ടിൽ നിന്ന് പോലീസ് സംഘം സാഹസികമായി പിടികൂടുകയായിരുന്നു. മൊബൈൽ പൂർണ്ണമായും ഒഴിവാക്കി ഒളിവിൽ കഴിഞ്ഞിരുന്ന പ്രതികളെ വിദഗ്ദമായ അന്വേഷണത്തിലുടെയാണ് പിടികൂടിയത്. വ്യാഴാഴ്ച രാത്രി എസ്.ഐ. നീൽ ഹെക്ടർ ഫെർണാണ്ടസ്, ഫ്രാൻസിസ് , എ.എസ്.ഐ കെ.ആർ സുധാകരൻ, കെ.വി.ജസ്റ്റിൻ, സീനിയർ സി.പി. ഒമാരായ ഇ.എസ്. ജീവൻ , ജിബിൻ ജോസഫ് , സോണി സേവ്യർ സി.പി. ഒ കെ.എസ്. ഉമേഷ് എന്നിവരാണ് പോലീസ് സംഘത്തിൽ ഉണ്ടായിരുന്നത്.
നിരവധി ക്രിമിനൽ കേസ്സുകളിലെ പ്രതിയായ ടോണി അയ്യമ്പുഴ സ്റ്റേഷനിൽ എട്ടും കാലടി സ്റ്റേഷനിൽ മൂന്നും എളമക്കര സ്റ്റേഷനിൽ രണ്ടും ചാലക്കുടി പീച്ചി സ്റ്റേഷനുകളിൽ ഒന്നു വീതം ക്രിമിനൽ കേസ്റ്റുകളിൽ പ്രതിയാണ്. വട്ടപറമ്പ് സ്വദേശിയ റിജോ അങ്കമാലി സ്റ്റേഷനിൽ ആറോളം കേസ്സിലും അരുൺ മുരിങ്ങൂരിൽ കടയച്ച് പോകുകയായിരുന്ന വ്യാപാരിയെ തലയ്ക്കടിച്ചു വീഴ്ത്തി പണം കവർന്ന കേസ്സിലും, മാള, വലപ്പാട് സ്റ്റേഷനുകളിലും സജേഷ് കൊരട്ടി, മതിലകം, മാള സ്റ്റേഷനുകളിലും വിവിധ കേസ്റ്റുകളിൽ പ്രതിയാണ്.
