ഇരിങ്ങാലക്കുട ഉപജില്ല സ്കൂൾ ശാസ്ത്രോൽസവം ; 475 പോയിന്റുമായി ലിറ്റിൽ ഫ്ളവർ സ്കൂൾ മുന്നിൽ …
ഇരിങ്ങാലക്കുട : വിദ്യാഭ്യാസ ഉപജില്ല സ്കൂൾ ശാസ്ത്രോത്സവത്തിൽ രണ്ട് ദിവസങ്ങളിലെ മൽസരങ്ങൾ പൂർത്തിയായപ്പോൾ 475 പോയിന്റുമായി ഇരിങ്ങാലക്കുട ലിറ്റിൽ ഫ്ളവർ സ്കൂൾ മുന്നേറ്റം തുടരുന്നു. 390 പോയിന്റുമായി നന്തിക്കര ജിവിഎച്ച്എസ്എസ് രണ്ടാം സ്ഥാനത്തും 351 പോയിന്റ് നേടി കൊണ്ട് ആനന്ദപുരം ശ്രീകൃഷ്ണ സ്കൂൾ മൂന്നാം സ്ഥാനത്തുമുണ്ട്. ഉപജില്ലയിലെ 176 വിദ്യാലയങ്ങളിൽ നിന്നായി 3200 കുട്ടികളാണ് മൂന്ന് ദിവസങ്ങളിലായി മാപ്രാണം ഹോളി ക്രോസ് ഹയർ സെക്കണ്ടറി സ്കൂളിൽ നടക്കുന്ന ശാസ്ത്രോൽസവത്തിൽ പങ്കെടുക്കുന്നത്. രണ്ടാം ദിനത്തിൽ നടന്ന പ്രവൃത്തി പരിചയ മേളയിൽ 130 ഇനങ്ങളിലായി 985 കുട്ടികളാണ് പങ്കെടുത്തത്. വ്യാഴാഴ്ച 4 മണിക്ക് നടക്കുന്ന സമാപന സമ്മേളനം ജില്ലാ പഞ്ചായത്ത് വൈസ് – പ്രസിഡണ്ട് ഷീന പറയങ്ങാട്ടിൽ ഉദ്ഘാടനം ചെയ്യും. ബ്ലോക്ക് പ്രസിഡണ്ട് ലളിത ബാലൻ സമ്മാനദാനം നിർവഹിക്കും.
