വർണ്ണക്കുട: നൃത്ത സംഗീത വേദിയിൽ കലാകാരൻമാർക്ക് ആദരം..
ഇരിങ്ങാലക്കുട : ഇരിങ്ങാലക്കുടയുടെ കലാ-കായിക-കാർഷിക മഹോത്സവമായ ‘വർണ്ണക്കുട’ യിൽ നടന്ന സാംസ്കാരിക സമ്മേളനവും ആദരവും തൃശൂർ ജില്ല പഞ്ചായത്ത് പ്രസിഡണ്ട് പി.കെ.ഡേവിസ് മാസ്റ്റർ ഉദ്ഘാടനം ചെയ്തു. ബഹു.ഉന്നത വിദ്യാഭ്യാസ സാമൂഹ്യ നീതി വകുപ്പ് മന്ത്രി ഡോ.ആർ.ബിന്ദു അദ്ധ്യക്ഷത വഹിച്ച ചടങ്ങിൽ എം.എൽ.എ മാരായ വി.ആർ.സുനിൽ കുമാർ, എൻ. കെ.അക്ബർ എന്നിവർ മുഖ്യാതിഥികളായിരുന്നു. കേരള ഫീഡ്സ് ചെയർമാൻ കെ.ശ്രീകുമാർ മുഖ്യപ്രഭാഷണം നടത്തി. മണ്ഡലത്തിലെ സി.ഡി.എസ്. ചെയർപേഴ്സൻമാർ,
സാംസ്കാരിക രംഗത്തെ പ്രമുഖർ എന്നിവർ വേദിയിൽ സന്നിഹിതരായിരുന്നു. തൃശൂർ ജില്ല പഞ്ചായത്ത് പൊതുമരാമത്ത് സ്റ്റാൻ്റിംഗ് കമ്മിറ്റി ചെയർ പേഴ്സനും സംഘാടക സമിതി വൈസ് ചെയർമാനുമായ ലത ചന്ദ്രൻ സ്വാഗതവും ജില്ല പഞ്ചായത്തംഗം ഷീല അജയഘോഷ് നന്ദിയും പറഞ്ഞു.
വിവിധ മേഖലകളിൽ പ്രാഗത്ഭ്യം കൈവരിച്ചവരെ ആദരിക്കുന്ന ചടങ്ങിൽ സിനിമ സംവിധായകൻ മോഹൻ, കാർട്ടൂണിസ്റ്റ് എം.മോഹൻദാസ്, ചിത്രകാരൻ മഹേശ്വർ, നർത്തകിയും സിനിമതാരവുമായ അനുപമ മോഹൻ, ആർട്ടിസ്റ്റ് രാജു എന്നിവരെ ആദരിച്ചു.വർണ്ണക്കുട അനുബന്ധ പരിപാടികളിലെ വിജയികൾക്ക് സമ്മാനദാനം നടത്തി.
തിങ്കളാഴ്ച്ച വർണ്ണക്കുടയിൽ രാവിലെ 9.30 ന് ഓണക്കളി മത്സരവും ഉച്ചത്തിരിഞ്ഞ് 5.30ന് സാംസ്കാരിക സമ്മേളനവും തുടർന്ന് തൈക്കൂടം ബ്രിഡ്ജിന്റെ മ്യൂസിക് ബാൻ്റും അരങ്ങേറും.
