നിയന്ത്രണം വിട്ട ആംബുലന്‍സ് വൈദ്യുതി പോസ്റ്റുകളിലിടിച്ച് റോഡില്‍ മറിഞ്ഞു; അപകടം പോട്ട – മൂന്നുപീടിക സംസ്ഥാനപാതയിൽ…
ഇരിങ്ങാലക്കുട: നിയന്ത്രണം വിട്ട ആംബുലന്‍സ് വൈദ്യുതി പോസ്റ്റിലിടിച്ച് റോഡില്‍ മറിഞ്ഞു. ഇന്ന് പുലര്‍ച്ച 6.30 യോടെ ഇരിങ്ങാലക്കുട ചന്തക്കുന്ന്-മൂന്നുപീടിക റോഡിൽ കെഎസ് കമ്പനിയിൽ നിന്ന് അല്പം മാറിയായിരുന്നു സംഭവം. കോട്ടയം മെഡിക്കല്‍ കോളജില്‍നിന്നും മൃതദേഹവുമായി ചാവക്കാട്ടേക്ക് പോയ ആംബുലന്‍സ് തിരിച്ചു വരുമ്പോഴാണ് അപകടം നടന്നത്. അപകടം നടക്കുന്ന സമയം ചെറിയ തോതില്‍ ചാറ്റല്‍ മഴ ഉണ്ടായിരുന്നു. ആംബുലന്‍സ് ഡ്രൈവര്‍ ഈരാട്ടുപേട്ട സ്വദേശി തന്നാലപറമ്പില്‍ വീട്ടില്‍ അല്‍താഫ് പരിക്കുകളില്ലാതെ രക്ഷപ്പെട്ടു. ഡ്രൈവർ മാത്രമാണ് വണ്ടിയിൽ ഉണ്ടായിരുന്നത്. എതിരെ വന്ന ബൈക്കിന് സൈഡ് നല്‍കുന്നതിനിടയില്‍ ആംബുലന്‍സിന്റെ നിയന്ത്രണം നഷ്ടപ്പെടുകയും റോഡരികിലെ ഇലക്ട്രിക് പോസ്റ്റുകളില്‍ ഇടിക്കുകയും റോഡിനു കുറുകെ മറിയുകയുമായിരുന്നു. നാല് ഇലക്ട്രിക് പോസ്റ്റുകളും കേബിള്‍ ടിവികളുടെ പോസ്റ്റുകളും തകര്‍ന്നു. ഈ സമയം ഇതുവഴി യാത്രക്കാര്‍ ഇല്ലാതിരുന്നതിനാല്‍ വലിയ അപകടം ഒഴിവായി. അപകടത്തെ തുടർന്ന് ഒന്നര മണിക്കൂർ നേരത്തേക്ക് ഇത് വഴിയുള്ള ഗതാഗതം സ്തംഭിച്ചു.ഇരിങ്ങാലക്കുട പോലീസ് സ്ഥലത്തെത്തി മേല്‍നടപടികള്‍ സ്വീകരിച്ചു.
