ഇരിങ്ങാലക്കുടയില്‍ പുലിയെ കണ്ടതായി അഭ്യൂഹം; ജനങ്ങള്‍ പരിഭ്രാന്തിയില്‍
ഇരിങ്ങാലക്കുട: പുലിയെ കണ്ടതായി സമൂഹമാധ്യമങ്ങളില്‍ സന്ദേശങ്ങള്‍ പ്രചരിച്ചതോടെ ജനങ്ങള്‍ പരിഭ്രാന്തിയില്‍. ഇരിങ്ങാലക്കുട ക്രൈസ്റ്റ് വിദ്യാനികേതന്റെ ഗ്രൗണ്ടിലാണു കഴിഞ്ഞ രണ്ടു ദിവസമായി പുലിയുടെ സാന്നിധ്യമുള്ളതായി കരുതുന്നത്. പുലിയുടെ സാമ്യമുള്ള കാല്‍പാടുകള്‍ കണ്ടെത്തിയിട്ടുണ്ട്. സ്‌കൂളിലെ സെക്യുരിറ്റിയും കരാര്‍ തൊഴിലാളികളും പുലിയെ കണ്ടതായി പറയപ്പെടുന്നുണ്ട്. കഴിഞ്ഞ ദിവസം രാത്രി 10 മണിക്കു ശേഷമാണ് ഇവര്‍ പുലിയെ കണ്ടത്. സ്‌കൂളധികൃതരുടെ പരാതിയെ തുടര്‍ന്നു പോലീസും വനംവകുപ്പും സ്ഥലത്തെത്തി അന്വേഷണം നടത്തുന്നുണ്ട്. ഒരു മാസം മുമ്പ് ആസാദ് റോഡില്‍ വല്ലച്ചിറക്കാരന്‍ മൈക്കിളിന്റെ വീട്ടുപറമ്പിലും പുലിയുടേതെന്നു തോന്നിപ്പിക്കുന്ന കാല്‍പാദം കണ്ടിരുന്നു. കാട്ടുപൂച്ചയുടെതോ പുള്ളിപുലിയുടെതോ ആണ് ഈ കാല്‍പാടുകളെന്ന് അന്നു സൂചന നല്‍കിയിരുന്നു. പിന്നീട് ഒരു മാസത്തിനു ശേഷമാണ് ഇപ്പോള്‍ പുലിയുടെ സാന്നിധ്യം വ്യക്തമാകുന്നത്.
