വിശ്വസാഹിത്യത്തിൽ വിസ്മയം തീർത്ത മലയാളി എഴുത്തുകാരുടെ പട്ടികയിലേക്ക് സംഗമേശ്വരൻ്റെ നാട്ടിൽ നിന്ന് ഒരു എഴുത്തുകാരി; ” ദി മിസ്റ്റീരിയസ് ഡാൻസ് ഓഫ് വിൻ്റേജ് ഫോളീസ് ” വായനക്കാരുടെ കൈകളിലേക്ക്..
തൃശൂർ: വിശ്വസാഹിത്യത്തിൽ വിസ്മയം തീർത്ത മലയാളി എഴുത്തുകാരുടെ പട്ടികയിലേക്ക് സംഗമേശ്വരൻ്റെ നാട്ടിൽ നിന്ന് ഒരു എഴുത്തുകാരി കൂടി. വടക്കൻ കേരളത്തിലെ ഒരു സാങ്കല്പിക ഗ്രാമത്തിൻ്റെ പശ്ചാത്തലത്തിൽ തെയ്യം കലാകാരൻ്റെ സ്വത്വപരമായ പ്രതിസന്ധികളിലൂടെ സഞ്ചരിക്കുന്ന ” ദി മിസ്റ്റീരിയസ് ഡാൻസ് ഓഫ് വിൻ്റേജ് ഫോളീസ്” (The Mysterious Dance of Vintage Follies) ലോകമെമ്പാടുമുള്ള വായനക്കാരുടെ കൈകളിലേക്ക് എത്തിക്കഴിഞ്ഞു. ” ഇന്ത്യൻ റൈറ്റിംഗ് ഇൻ ഇംഗ്ലീഷ് ” എന്ന വിഷയത്തിൽ കോയമ്പത്തൂർ കാരുണ്യ സർവകലാശാലയിൽ ഗവേഷണം നടത്തുന്ന ഹേമ സാവിത്രിയുടെ ആദ്യ നോവൽ കൂടിയാണിത്. അമ്പതുകൾ പിന്നിട്ട ദളിത് കലാകാരനായ കേശുവും കേശുവിൻ്റെ ജീവിതത്തിലേക്ക് അറിഞ്ഞും അറിയാതെയും കടന്നു വരുന്ന പത്തോളം കഥാപാത്രങ്ങളിലൂടെയാണ് മുന്നൂറോളം പേജുകൾ ഉള്ള നോവൽ മുന്നോട്ട് പോകുന്നത്. ദൈവത്തിൻ്റെ പരിവേഷം ചില സമയങ്ങളിൽ കൈവരുന്ന കേശു അതേ സമയം സമൂഹത്തിൽ നിന്നുള്ള നിരന്തര അവഗണനകൾ നേരിടുന്നവൻ കൂടിയാണ്. ദ്വന്ദവ്യക്തിത്വവുമായി പടവെട്ടിയാണ് കേശുവിൻ്റെ ജീവിതം. അപകടമെന്നോ കൊലപാതകമെന്നോ വിശേഷിപ്പിക്കാവുന്ന ഒരു കാഴ്ചക്ക് വിധേയനാകുന്ന കേശുവിൽ നിന്നാണ് നോവൽ ആരംഭിക്കുന്നത്. ” തെയ്യം എന്ന കലയുടെ അപൂർവമായ സൗന്ദര്യമാണ് കഥയുടെ പരിസരങ്ങളിലേക്ക് ആനയിച്ചത്. എഴുത്തിൻ്റെയും രചനയുടെയും രാഷ്ട്രീയം വായനക്കാർ തന്നെ തീരുമാനിക്കട്ടെ” – ഹേമ സാവിത്രി പറയുന്നു.
ഗവേഷണത്തിൻ്റെ ഫൈനൽ തീസിസ് സമർപ്പിക്കാനുള്ള ഒരുക്കങ്ങൾക്കിടയിലുള്ള അഞ്ച് മാസങ്ങൾ കൊണ്ടാണ് രചന പൂർത്തിയാക്കിയത് .അന്താരാഷ്ട്ര ജേർണലുകളിൽ കവിതകൾ രചിച്ചിട്ടുള്ള ഹേമ ഒരു കവിതാ സമാഹാരത്തിൻ്റെ പണിപ്പുരയിൽ കൂടിയാണിപ്പോൾ.കവിതയോട് തന്നെയാണ് തൻ്റെ പ്രഥമ പ്രണയമെന്ന് പട്ടണത്തിലെ പ്രമുഖ വിദ്യാലയത്തിൽ എഴ് വർഷത്തോളം ഇംഗ്ലീഷ് അധ്യാപികയുടെ വേഷമണിഞ്ഞിട്ടുള്ള എഴുത്തുകാരി സൂചിപ്പിക്കുന്നുണ്ട്. സുഹ്യത്തും അധ്യാപികയുമായ ദിവ്യ ധില്ലനാണ് പുസ്തകത്തിൻ്റെ കവർ ചിത്രത്തിന് രൂപം നല്കിയിരിക്കുന്നത്. ഡൽഹി കേന്ദ്രീകരിച്ച് പ്രവർത്തിക്കുന്ന പെൻമാൻ ബുക്ക്സ് പ്രസിദ്ധീകരിച്ചിട്ടുള്ള നോവൽ കഴിഞ്ഞ ദിവസം ഓൺലൈനായി നടന്ന ചടങ്ങിൽ എഴുത്തുകാരൻ തൻമയ് ദുബെയാണ് പ്രകാശനം ചെയ്തത്. ആമസോണിലൂടെ വായനക്കാർക്ക് പുസ്തകം ലഭ്യമാണ്. ഇരിങ്ങാലക്കുടയ്ക്കടുത്ത് ഐക്കരക്കുന്നിൽ അരിയ്ക്കത്ത് മനയിൽ സജുവിൻ്റെ ഭാര്യയാണ്. പത്താം ക്ലാസ്സ് വിദ്യാർഥി ശ്രീദത്തൻ മകനാണ്.
